ទិន្នន័យផ្លូវការ បានបង្ហាញនៅថ្ងៃអង្គារ (ទី១៣ ខែសីហា) នេះថា កម្លាំងខ្យល់ព្យុះដ៏ខ្លាំងក្លា ដែលបានបក់បោកលើប្រទេសឥណ្ឌា និងនេប៉ាល់ បានសម្លាប់មនុស្សរាប់រយនាក់ គិតចាប់តាំងពីខែមិថុនាមក ដោយបង្កជាទឹកជំនន់ និងបំណាក់ដីដែលបណ្តាលឲ្យមានការបំផ្លិចបំផ្លាញគ្រប់ទីកន្លែង ក្នុងរដូវមូសុងដ៏គ្រោះថ្នាក់នេះ។

ការស្លាប់នោះរាប់បញ្ចូលទាំងចំនួន នៅក្នុងប្រទេសឥណ្ឌា ក្នុងខែសីហាតែមួយ ហើយចំនួនសរុបយ៉ាងហោចណាស់ ១៧១នាក់ នៅក្នុងប្រទេសជិតខាងនេប៉ាល់។ គ្រោះមហន្តរាយទាក់ទងនឹងអាកាសធាតុ គឺជារឿងកើតឡើងធម្មតា នៅក្នុងរដូវមូសុង ដែលមានចាប់ពីខែមិថុនា ដល់ខែកញ្ញា ប៉ុន្តែអ្នកជំនាញនិយាយថា បម្រែបម្រួលអាកាសធាតុកំពុងធ្វើឲ្យមានភាពញឹកញាប់ និងធ្ងន់ធ្ងរជាងមុន។

នៅឥណ្ឌា យោងទៅតាមអ្នកជំនាញអាកាសធាតុរបស់រដ្ឋាភិបាល បានឲ្យដឹងថា ត្រឹមតែប៉ុន្មានខែប៉ុណ្ណោះ បន្ទាប់ពីប្រទេសបានទទួលរងនូវរលកកម្ដៅដ៏វែងបំផុតមិនធ្លាប់មាន ព្យុះភ្លៀងដ៏ខ្លាំងក្លា បានបង្កឲ្យមានទឹកជំនន់ និងបំណាក់ដីគ្រប់ទីកន្លែង។

នាយកដ្ឋានឧតុនិយមបានព្រមានពីការមានភ្លៀងធ្លាក់ខ្លាំង ដែលភាគច្រើន មាននៅរដ្ឋភាគខាងត្បូង និងភាគឦសាន។ ក្រុមជួយសង្គ្រោះបានស្វែងរកអ្នកបាត់ខ្លួន ២នាក់ បន្ទាប់ពីមានអ្នកលង់ទឹកស្លាប់ ៩នាក់ នៅក្នុងតំបន់ Una របស់រដ្ឋ Himachal Pradesh។ មន្ត្រីតំបន់បាននិយាយថា ការស្វែងរកនៅតែបន្តស្វែងរកអ្នកបាត់ខ្លួន។ ចំណែកនៅរដ្ឋ Uttar Pradesh យ៉ាងហោចណាស់មនុស្ស ១៧នាក់ បានស្លាប់នៅក្នុងទឹកជំនន់ដែលបង្កឡើងដោយភ្លៀងធ្លាក់ខ្លាំង។ ហើយកាលពីខែកក្កដា នៅរដ្ឋ Kerala មនុស្សជាង ២០០នាក់ បានស្លាប់ ដោយសារតែបំណាក់ដី។

នៅនេប៉ាល់ឯណោះវិញ មានអ្នកបាត់បង់ជីវិត ១៧១នាក់ហើយ គិតចាប់តាំងពីភ្លៀងមូសុង ចាប់ផ្តើមនៅពាក់កណ្តាលខែមិថុនា ក្នុងនោះរួមទាំងចំនួន ១០៩នាក់ នៅក្នុងហេតុការណ៍បំណាក់ដីផងដែរ។ យោងតាមអាជ្ញាធរគ្រោះមហន្តរាយបានឲ្យដឹងថា ការស្លាប់ផ្សេងទៀត គឺបណ្តាលមកពីទឹកជំនន់ និងរន្ទះបាញ់។ ជាមួយគ្នានេះ មនុស្សជាង ៤០នាក់ កំពុងបាត់ខ្លួន ហើយជាង ២០០នាក់បានរងរបួស៕