អ្នកស៊ើបអង្កេតអង្គការសហប្រជាជាតិ (UN) នៅថ្ងៃអង្គារ (ទី១៣ ខែសីហា) នេះ បានព្រមានថា ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាមដែលប្រព្រឹត្តដោយយោធារបស់ហសភាពមីយ៉ាន់ម៉ា បាន «កើនឡើងក្នុងអត្រាគួរឲ្យព្រួយបារម្ភ» ដោយលើកឡើងពីការធ្វើទារុណកម្មជាប្រព័ន្ធ ការរំលោភបូក និងការរំលោភបំពានលើកុមារ។

យន្តការស៊ើបអង្កេតឯករាជ្យរបស់អង្គការសហប្រជាជាតិសម្រាប់មីយ៉ាន់ម៉ា (IIMM) បានលើកឡើងថា ក្នុងរយៈពេល ៦ខែចុងក្រោយនេះ គេប៉ាន់ប្រមាណថា មនុស្សជាង ៣លាននាក់ ត្រូវបានភៀសខ្លួនទាំងបង្ខំចេញពីផ្ទះសម្បែងរបស់ពួកគេ ខណៈដែលជម្លោះកំពុងរាលដាលនៅក្នុងប្រទេស។

នៅក្នុងរបាយការណ៍ប្រចាំឆ្នាំរបស់ខ្លួន ដែលគ្របដណ្តប់លើរយៈពេលពីថ្ងៃទី១ ខែកក្កដា ឆ្នាំ២០២៣ ដល់ថ្ងៃទី៣០ ខែមិថុនា ឆ្នាំ២០២៤ IIMM បានលើកឡើងថា ជម្លោះនៅមីយ៉ាន់ម៉ា «បានកើនឡើងយ៉ាងខ្លាំង» នាពេលនោះ «ដោយមានរបាយការណ៍អំពីឧក្រិដ្ឋកម្មញឹកញាប់ និងឃោរឃៅ ដែលបានប្រព្រឹត្តនៅទូទាំងប្រទេស»។

ក្រុមអ្នកស៊ើបអង្កេត បានប្រាប់ថា ពួកគេបានប្រមូលភ័ស្តុតាងសំខាន់ៗនៃឧក្រិដ្ឋកម្មសង្គ្រាមខ្លាំងក្លា និងហិង្សា ក្នុងនោះរួមទាំងការវាយប្រហារតាមអាកាសលើសាលារៀន អគារសាសនា និងមន្ទីរពេទ្យ ដោយមិនបានកំណត់គោលដៅយោធាច្បាស់លាស់។

គួរបញ្ជាក់ថា របបយោធាដែលកំពុងគ្រប់គ្រងសហភាពមីយ៉ាន់ម៉ា បានឡើងកាន់អំណាចដោយការធ្វើរដ្ឋប្រហារខែកុម្ភៈ ឆ្នាំ២០២១ ដែលបានទម្លាក់រដ្ឋាភិបាលជាប់ឆ្នោតរបស់លោកស្រី Aung San Suu Kyi ដោយបានបញ្ចប់ការដកបទពិសោធន៍រយៈពេល ១០ឆ្នាំជាមួយនឹងលទ្ធិប្រជាធិបតេយ្យ ហើយនិងបានរុញប្រទេសអាស៊ីអាគ្នេយ៍មួយនេះធ្លាក់ចូលទៅក្នុងភាពចលាចលបង្ហូរឈាម៕