ភ្នំពេញ ៖ក្រសួងបរិស្ថានកំពុងរៀបចំទិញធុងសំរាម ត្រៀមចែកជូនសាលារៀននៅទូទាំងប្រទេសកម្ពុជា ដើម្បីងាយស្រួលងាយញែកសំរាម។នេះបើតាមការឱ្យដឹងពីឯកឧត្តមរដ្ឋមន្រ្តីក្រសួងបរិស្ថាន។

មន្ទីរបរិស្ថានរាជធានីភ្នំពេញ នៅល្ងាចថ្ងៃទី១៣ ខែសីហា ឆ្នាំ២០២៤ បានរៀបចំពិធីសំណេះសំណាល និងសួរសុខទុក្ខជាមួយមន្រ្តីរាជការ មន្ទីរបរិស្ថានរាជធានីភ្នំពេញ ក្រោមគណៈអធិបតីភាពឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ។

នៅក្នុងពិធីជួបសំណេះសំណាល ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា បន្ទាប់ពីទទួលបានជោគជ័យក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិក ក្រសួងបរិស្ថានកំពុងរៀបចំទិញធុងសំរាមត្រៀមចែកជូនសាលារៀនទាំងអស់នៅក្នុងប្រទេសកម្ពុជាយ៉ាងតិចក្នុងមួយសាលាទទួលបានពីរ សម្រាប់ដាក់សំណល់ប្លាស្ទិកមួយ និងមួយទៀតសំរាប់ដាក់សំណល់ទូទៅ។ ការញែកសំរាមឱ្យដាច់ពីគ្នានេះ គឺដើម្បីកែប្រែទីលានទុកដាក់សំរាមឱ្យទៅជាទីលានចាក់បំពេញ ងាយអភិវឌ្ឍនាពេលអនាគត។

បន្ថែមលើនេះ ឯកឧត្តមបណ្ឌិត អ៊ាង សុផល្លែត បានវាយតម្លៃខ្ពស់ចំពោះថ្នាក់ដឹកនាំ, មន្ត្រីរាជការ និងមន្ត្រីឧទ្យាននុរក្សនៃក្រសួងបរិស្ថាន ដែលបានខិតខំអស់ពីកម្លាំងកាយ, បញ្ញាស្មារតី ក្នុងបុព្វហេតុការពារបរិស្ថាន និង ការពារធនធានធម្មជាតិ ដែលជាឧត្តមប្រយោជន៍មួយរបស់ជាតិមាតុភូមិ និងការរួមចំណែកយ៉ាងសំខាន់ក្នុងការការពារទឹកដីមាតុភូមិកម្ពុជា។

គួរបញ្ជាក់ដែរថា ក្រសួងបរិស្ថានបានដាក់ចេញនូវយុទ្ធសាស្រ្តចក្រាវិស័យបរិស្ថាន ២០២៣-២០២៨ ដោយមានយុទ្ធសាស្ត្រស្នូលផ្តោតសំខាន់លើមុំបីគឺ ការពង្រឹងគោលនយោបាយ ការកសាងរដ្ឋបាលឌីជីថល និងការពង្រីកការផ្សព្វផ្សាយ ដែលជាកម្លាំងចលកររុញបង្វិលយុទ្ធសាស្រ្តចម្បងចំនួនបី គឺ«ភាពស្អាត ភាពបៃតង និងចីរភាព» ឱ្យដំណើរការដោយរលូន និងប្រសិទ្ធភាព។ អត្ថបទ៖ទូច សោភ័ណ