បន្ទាប់ពីសម្តេច អគ្គមហាសេនាបតីតេជោ ហ៊ុនសែន អតីតនាយករដ្ឋមន្ត្រី និង ជា​ប្រធាន​ព្រឹទ្ធសភា បានផ្តួចផ្តើមបង្កើតកិច្ចសហប្រតិបត្តិការតំបន់អភិវឌ្ឍត្រីកោណ កម្ពុជា ឡាវ វៀតណាម រយៈពេល២៥ឆ្នាំមកនេះ ខេត្តមណ្ឌលគិរី ដែលជាខេត្តមួយក្នុងចំណោមខេត្តទាំង ៤ របស់​កម្ពុជា កំពុងទទួលបានការអភិវឌ្ឍទាំងហេដ្ឋារចនាសម្ពន្ធ័ ការតភ្ជាប់សេដ្ឋកិច្ច ពាណិជ្ជកម្ម និងការកសាងបានព្រំដែនសន្តិភាពយ៉ាងរឹងមាំជាមួយនឹងប្រទេសក្បែរខាង។

ឯកឧត្តម​ ថង​ សាវុន​ អភិបាលនៃគណៈអភិបាលខេត្តមណ្ឌលគិរី​ បានថ្លែងបញ្ជាក់ថា​ តាមរយៈកិច្ចសហប្រតិបត្តិការ​ តំបន់អភិវឌ្ឍត្រីកោណCLV រយៈពេល២៥​ ខេត្តមណ្ឌលគិរី​មានការអភិវឌ្ឍរីកចម្រើន​ ទាំងសេដ្ឋកិច្ច​ សង្គម​ ជីវភាពរស់នៅរបស់ប្រជាពលប្រសើរឡើង។ ជាក់ស្តែងស្រុកកែវសីមា​ ព្រំដែនទ្វេភាគី​ ជាប់ទៅនឹង​ ស្រុកបួរដ៊ូប​ ខេត្តប៉ិញភឿក​ ប្រទេសវៀតណាម​ មានការបោះបង្គោលព្រំដែនយ៉ាងរឹងមាំ​ មានកសាងហេដ្ឋារចនា​សម្ព័ន្ធ​ តភ្ជាប់ ព្រំដែន​នៃប្រទេសទាំង២យ៉ាងរឹងមាំ បន្ថែមលើសពីនោះ​ សកម្មភាពការដោះដូរទំនិញ​ និង ការឆ្លងចេញចូលរបស់ប្រជាជន នៃ ប្រទេសទាំង២​ មានការគោរពទៅតាមច្បាប់ត្រឹមត្រូវ​ គ្មានការឈ្លានពាន​ កាត់ទឹកដីកម្ពុជាទៅអោយប្រទេសវៀតណាមនោះឡើយ។

ឯកឧត្តម ថង សាវុន បានបន្ថែមទៀតថា ប្រជាពលរដ្ឋ ពីគ្រប់ទិសទី អាចធ្វើដំណើរមកកាន់​ខេត្ត​មណ្ឌលគិរី ដើម្បីពិនិត្យមើលទីតាំងព្រំដែន និង ស្ថានភាពរស់នៅដោយផ្ទាល់របស់​ប្រជាពលរដ្ឋ​នៅ​ក្នុង​ខេត្ត ដើម្បីកុំអោយមានការបារម្ភរឿងបាត់បង់ទឹកដី ដែលក្រុមមួយក្តាប់តូច កំពុងព្យាយាម​បង្ក​ចលាចល។ ឯកឧត្តមអភិបាលខេត្តបានថ្កោលទោសចំពោះក្រុមអគតិទាំងនោះ ហើយ​ក្នុង​នាម​ជា​ថ្នាក់ដឹកនាំខេត្ត ប្តេជ្ញាការពារ ចំពោះដែនអធិបតីភាពទឹកដី និង បន្តជឿជាក់លើការ​ដឹកនាំ​របស់​រាជ​រដ្ឋាភិបាលដែលកំពុងដឹកនាំដោយសម្តេចបវរមហាធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

សូមបញ្ជាក់ថា ខេត្តមណ្ឌលគិរី មានព្រំដែនទ្វេភាគីជាមួយប្រទេសវៀតណាមចំនួន៤ច្រក គឺទី១ ច្រកឡាប៉ាខេ ស្រុកកែវសីមា ជាប់ជាមួយ ស្រុកបួដ៊ូប ខេត្តប៉ិញភឿក ច្រកទី២ គឺដាក់ដាំ ភ្ជាប់ស្រុកអូររាំង ទៅស្រុកដាក់ណុង ច្រកទី៣ គឺ ណាំលៀ ភ្ជាប់ស្រុកពេជ្រាដា ទៅ ស្រុក ដាក់ម៉ិល និង ច្រកទី៤ គឺ ជីមៀត ដែលមិនទាន់ដំណើរការនៅឡើយ។ រីឯការងារបោះបង្គោលព្រំដែនសម្រាប់ខេត្តមណ្ឌលគីរី សម្រេចបានប្រមាណជាង ៩០ភាគរយ៕ អត្ថបទ៖ សូដាវណ្ណ