ក្រសួងយុត្តិធម៌ បាននិយាយថា អ្នកវិភាគស៊ើបការណ៍សម្ងាត់របស់កងទ័ពសហរដ្ឋអាមេរិក កាលពីថ្ងៃអង្គារ ទី១៣ ខែសីហា បានផ្តល់ចម្លើយពីភាពមានទោសចំពោះការចោទប្រកាន់ពីបទសមគំនិតក្នុងការលក់ព័ត៌មានសម្ងាត់យោធាទៅឱ្យប្រទេសចិន។ លោក Korbein Schultz ត្រូវបានចោទប្រកាន់កាលពីខែមីនា ពីបទសមគំនិតក្នុងការបង្ហាញព័ត៌មានការពារជាតិ ការបញ្ចេញអត្ថបទការពារជាតិ និងទិន្នន័យបច្ចេកទេសដោយគ្មានអាជ្ញាប័ណ្ណ និងការស៊ីសំណូករបស់មន្ត្រីសាធារណៈ។

យោងតាមឯកសារចោទប្រកាន់ និងផ្តល់ចម្លើយ បានឲ្យដឹងថា លោក Schultz ជាអ្នកដែលមានសិទ្ធទទួលព័ត៌មានសម្ងាត់ បានឃុបឃិតជាមួយបុគ្គលម្នាក់ រស់នៅក្នុងទីក្រុងហុងកុង ដែលលោកត្រូវបានសង្ស័យថាមានទំនាក់ទំនងជាមួយរដ្ឋាភិបាលចិន ដើម្បីប្រមូលព័ត៌មានការពារជាតិ រួមទាំងព័ត៌មានសម្ងាត់បំផុត និងទិន្នន័យបច្ចេកទេសដែលគ្រប់គ្រងការនាំចេញ ទាក់ទងនឹងប្រព័ន្ធអាវុធយោធាសហរដ្ឋអាមេរិកជាថ្នូរជាមួយប្រាក់ ។

លោក Robert Wells ជំនួយការនាយកប្រតិបត្តិរបស់ទីភ្នាក់ងារ FBI បាននិយាយនៅក្នុងសេចក្តីថ្លែងការណ៍ថា «រដ្ឋាភិបាល ដូចជាប្រទេសចិន កំពុងដាក់គោលដៅយ៉ាងខ្លាំងក្លាទៅលើបុគ្គលិកយោធា និងព័ត៌មានសន្តិសុខជាតិរបស់យើង ហើយយើង នឹងធ្វើអ្វីគ្រប់យ៉ាងនៅក្នុងអំណាចរបស់យើង ដើម្បីធានាបានថា ព័ត៌មានត្រូវបានការពារ ពីរដ្ឋាភិបាលបរទេសដែលមានអរិភាព»។

ក្រសួងយុត្តិធម៌ បាននិយាយថា មុនពេលលោកត្រូវបានចាប់ខ្លួន លោកបានបញ្ជូនឯកសារយោធាជាច្រើនដែលមានលក្ខណៈរសើប និងរឹតត្បិត ប៉ុន្តែមិនត្រូវបានចាត់ថាជាឯកសារយោធាសម្ងាត់នោះទេ។

យោងតាមក្រសួងបានឱ្យដឹងថា លោក Schultz ត្រូវបានគេបង់ប្រាក់ឲ្យប្រហែល ៤២.០០០ ដុល្លារអាមេរិក សម្រាប់ព័ត៌មាន។