បាល់ទាត់៖ ក្រុមអាស៊ីយូណាយធីតបានបន្ថែម ៣ពិន្ទុទៀតហើយដើម្បីរក្សាឱកាសប្រជែងកៅអី Top-8 នៅក្នុងការប្រកួតជុំទី២ នៃលីគកំពូលកម្ពុជាឆ្នាំ២០២១ បន្ទាប់ពីយកឈ្នះក្រុមភ្ញៀវសូលទីឡូអង្គរដោយលទ្ធផល ១-០ នៅកីឡដ្ឋាន AEU Sport Park កាលពីល្ងាចថ្ងៃទី០៩ ខែកញ្ញា ឆ្នាំ២០២១។
ជំនួបបង្គ្រប់សប្ដាហ៍ទី១១ នេះបានបញ្ចប់ដោយស្វិតស្វាញបំផុត បន្ទាប់ពីក្រុមទាំងពីរមិនអាចបំប៉ោងសំណាញ់ទីគ្នានៅវគ្គទី១។ ចំពោះគ្រាប់បាល់ជ័យជម្នះរបស់ក្រុមម្ចាស់ផ្ទះអាស៊ីអឺរ៉ុប បានកើតឡើងនៅនាទី៧៥ ដែលធ្វើសម្រេចដោយកីឡាករជប៉ុន Kanta Asami បន្ទាប់ពីបញ្ជូនយ៉ាងល្អពីមិត្តរួមក្រុម ស្លេះ ហាសាន។ យ៉ាងណាមិញក្រុមលោក អ៊ុក សុធី ក៏បានព្យាយាមដាក់សម្ពាធយ៉ាងខ្លាំងលើក្រុមម្ចាស់ផ្ទះអាស៊ីអឺរ៉ុបនៅចុងវគ្គទី២ ដែរ តាមរយៈការបង្កើតឱកាសស៊ុតជាច្រើនដងតែធ្វើមិនបានសម្រេចឡើយ មុនអាជ្ញាកណ្ដាលផ្លុំកញ្ចែបញ្ចប់ការប្រកួតពេញម៉ោង។ ជាមួយការបន្ថែម ៣ពិន្ទុនេះបានធ្វើឲ្យអាស៊ីអឺរ៉ុបបន្ដឈរលេខ៩ និងមាន ១០ពិន្ទុក្នុងដៃ ដោយកាត់បន្ថយគម្លាតពិន្ទុពីក្រុមឈរលេខរៀងទី៨ គិរីវង់សុខសែនជ័យ ២ពិន្ទុប៉ុណ្ណោះបន្ទាប់ពីឆ្លងកាត់ ១១ប្រកួតឈ្នះ៣ ស្មើ១ និងចាញ់៧។
តែយ៉ាងណាមិញគិរីវង់ហាក់មានប្រៀបជាង ដ្បិតពួកគេនៅសល់ ២ប្រកួតក្នុងជុំទី១ ពោលគឺពួកគេត្រូវការយ៉ាងច្រើន ២ពិន្ទុទៀតប៉ុណ្ណោះដើម្បីបញ្ចប់ក្ដីសង្ឃឹមអាស៊ីអឺរ៉ុបក្នុងការប្រជែងកៅអី Top-8។ សម្រាប់ ១ប្រកួតចុងក្រោយរបស់អាស៊ីអឺរ៉ុបនឹងត្រូវជួបព្រៃវែងអេហ្វស៊ីនាថ្ងៃទី១២ ខែកញ្ញាចុងសប្ដាហ៍នេះ ខណៈ ២ប្រកួតចុងក្រោយរបស់គិរីវង់គឺត្រូវជួបណាហ្គាវើលដ៏នាថ្ងៃទី១១-កញ្ញា និងជួបក្រុមនគរបាលជាតិនាថ្ងៃទី១៥ ខែកញ្ញា ឆ្នាំ២០២១ ខាងមុខដែលជាជំនួបចុងក្រោយក្នុងជុំទី១ នៃលីគកំពូលកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
