កំពង់ឆ្នាំង៖ ក្នុងកិច្ចប្រជុំគណៈបញ្ជាការឯកភាពរដ្ឋាបាលខេត្តកំពង់ឆ្នាំងនាព្រឹកថ្ងៃទី១៤ ខែសីហា ឆ្នាំ២០២៤នេះ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានធ្វើការព្រមានដល់ក្រុមជ្រុលនិយមមួយក្តាប់តូច កុំព្យាយាមផ្តួលរំលំរដ្ឋាភិបាលកម្ពុជាស្របច្បាប់ដែលកើតចេញពីការបោះឆ្នោតដោយប្រជាពលរដ្ឋអោយសោះ ព្រោះថ្មីៗនេះមានក្រុមប្រឆាំងជ្រុលនិយមក្រៅប្រទេសជាច្រើនបានធ្វើបដិវត្តន៍ពណ៌ប៉ុនប៉ងផ្តួលរំលំរដ្ឋាភិបាលកម្ពុជា និងញុះញង់ឱ្យពលរដ្ឋខ្មែរក្នុងស្រុក ធ្វើបាតុកម្មប្រឆាំងនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍(CLV-DTA) ។ ប្រសិនបើអយ្យការរកឃើញបទល្មើសនេះ នោះអ្នកប្រព្រឹត្តិនឹងជាប់ពន្ធនាគារចាប់ពី១៥ដល់៣០ ឬជាប់អស់មួយជីវិតតែម្តង។ 

ឯកឧត្តម ឯក ស៊ុនរស្មី បានបន្តថា៖ បើតាមក្រមព្រហ្មទណ្ឌ បាននិយាយពីបទល្មើសឧបឃាត និងការរួមគំនិតក្បត់ ដោយបញ្ជាក់ថា ក្នុងមាត្រា៤៥១ អ្នកដែលមានបំណងចង់ផ្តួលរំលំរដ្ឋាភិបាល និងប៉ុនប៉ងចង់ដណ្តើមអំណាច ត្រូវផ្តន្ទាទោសដាក់ពន្ធនាគារពី១៥ ឆ្នាំទៅ៣០ឆ្នាំ។ ចំណែកមាត្រា៤៥២ ប្រសិនជាបុគ្គលនោះជាអ្នករាជការសាធារណៈត្រូវផ្តន្ទាទោសដាក់ពន្ធនាគារអស់មួយជីវិត។ ចំពោះអ្នកដែលចូលរួមក្នុងគម្រោងផ្តួលរលំរដ្ឋាភិបាលនេះ ត្រូវមានទោសពីបទរួមគំនិតក្បត់ ក្នុងមាត្រា ៤៥៣ ដាក់ពន្ធនាគារបី៥ឆ្នាំ ទៅ១០ឆ្នាំ ហើយបើអ្នកប្រព្រឹត្តជាអ្នករាជការសាធារណៈវិញ ត្រូវជាប់ពន្ធនាគារពី១០ឆ្នាំ ទៅ២០ឆ្នាំ។ ជាមួយគ្នានេះ មាត្រា ៤៥៤ បង្ហាញថា បុគ្គលណាដែលចូលរួមអំពើរួមគំនិតក្បត់ ត្រូវលើកលែងឱ្យរួចពីការទទួលទោស ប្រសិនបើហ៊ានចេញមកសារភាព មុនការប្រព្រឹត្តិបទល្មើសនេះ និងមានការសហការនាំឱ្យស្គាល់អត្តសញ្ញាណអ្នកចូលរួមដដទៃទៀត។

ឯកឧត្តម ស៊ុន សុវណ្ណារិទ្ធ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំងបានថ្លែងថា៖ ក្នុងករណីដែលក្រុមជ្រុលនិយមក្រៅប្រទេសនាំគ្នាធ្វើបដិវត្តន៍ពណ៌ ចោទប្រកាន់រដ្ឋាភិបាលកម្ពុជា ដោយបំភ្លៃការពិត និងញុះញង់ឱ្យពលរដ្ឋខ្មែរធ្វើបាតុកម្មប្រឆាំងរដ្ឋាភិបាលចំពោះកិច្ចសហប្រតិបត្តិការតំបន់ត្រីកោណអភិវឌ្ឍន៍(CLV-DTA)នេះ នឹងត្រូវជាប់ទោសទៅតាមច្បាប់កំណត់ ព្រោះរដ្ឋាភិបាលកម្ពុជាស្របច្បាប់ មិនទុកអោយក្រុមជ្រុលនិយមប៉ុន្មាននាក់នោះ បង្ករសង្ក្រាមក្នុងប្រទេសកម្ពុជាបានទៀតឡើយ។ សុខសន្តិភាពរបស់កម្ពុជាដែលមានក្នុងថ្ងៃនេះ គឺបានមកពីការបង្ហូរសាច់ស្រស់ឈាមស្រស់របស់ថ្នាក់ដឹកនាំកំពូលៗកម្ពុជា ដូចនេះក្នុងនាមជាកូនខ្មែរ យើងមិនអនុញាតអោយក្រុមជ្រុលនិយមទាំងនោះ បង្កើតបដិវត្តន៍ពណ៌នៅក្នុងប្រទេសកម្ពុជាបានឡើយ។ មិនតែប៉ុណ្ណោះ ឯកឧត្តមក៏បានស្នើដល់កម្លាំងមានសមត្ថកិច្ចដែលពាក់ព័ន្ធ ចាត់វិធានការតឹងរ៉ឹងបំផុត ចំពោះឧក្រិដ្ឋកម្មប្រឆាំងសន្តិសុខរបស់រដ្ឋខាងលើ ដើម្បីការពារ និងថែរក្សាសន្តិសុខជាតិ ស្ថិរភាពក្នុងសង្គម៕ កាំង ហុងវាស្នា