តាកែវ៖ អភិបាលខេត្តតាកែវ ឯកឧត្តម វ៉ី សំណាង បានធ្វើការអំពាវនាវដល់បងប្អូនប្រជាពលរដ្ឋ នៅទូទាំងខេត្តតាកែវជាពិសេសប្អូនៗយុវជន យុវនារីដែលធ្វើការនៅតាមបណ្ដាលរោងចក្រ​សូម​រក្សាភាពស្ងប់ស្ងាត់ និងកុំនាំគ្នាធ្វើការប្រមូលផ្ដុំត្រៀមធ្វើកូដកម្ម បាតុកម្មប្រឆាំងរាជរដ្ឋាភិបាល​ស្របច្បាប់​ តាមការញុះញង់របស់ក្រុមប្រឆាំងនៅក្រៅប្រទេស ហើយបើមានករណីប្រមូលផ្ដុំខុសច្បាប់ សមត្ថកិច្ចនឹងធ្វើការបង្រ្កាបភ្លាមៗតែម្ដង។

នៅក្នុងកិច្ចសម្ភាសជាមួយទូរទស្សន៍ប៊ូធីវី នៅថ្ងៃទី១៤ ខែសីហា ឆ្នាំ២០២៤នេះ ឯកឧត្តម វ៉ី សំណាង បានមានប្រសាសន៍បន្តថា ប្រសិនបើបងប្អូនជឿតាមការញុះញង់របស់ក្រុមប្រឆាំង​នាំគ្នាទៅ​ធ្វើបាតុកម្ម កូដកម្ម វានឹងបង្កអោយមានអសន្តិសុខដល់ប្រទេសជាតិ និងនាំអោយបែកបាក់​សាមគ្គីភាព​និងសុខសន្តិភាពដែលរាជរដ្ឋាភិបាលបានស្វែងរកបានដោយលំបាក។ យើងបែកបាក់គ្នា ឈ្លោះ​ទាស់ទែង​គ្នាជាង៥រយឆ្នាំមកហើយ ប្រទេសយើងទើបមានសុខសន្តិភាពជាង ២០ឆ្នាំប៉ុណ្ណោះ ដូច្នោះសូមបងប្អូនប្រឹងប្រែងអភិវឌ្ឍន៍ខ្លួន ប្រឹងប្រែងធ្វើការដើម្បីក្រុមគ្រួសារ និងសង្គមជាតិយើង។

ឯកឧត្តមអភិបាលខេត្តតាកែវ ថ្លែងបន្តថា ក្នុងនាមប្រធានគណៈបញ្ជាការឯកភាពរដ្ឋបាលខេត្ត​បាន​ចេញបទបញ្ជា​យ៉ាង​តឹងរ៉ឹង ដោយយើងបានបញ្ជាទៅរដ្ឋបាលក្រុងស្រុក និងសមត្ថកិច្ចពាក់ព័ន្ធ​ធ្វើការ​តាមដាន ត្រួតពិនិត្យរាល់ការប្រមូលផ្ដុំ នឹងមិនអនុញ្ញាតអោយមានការប្រមូលផ្ដុំណាមួយនោះទេ ហើយយើងនិងធ្វើការអនុវត្តន៍ច្បាប់ចំពោះបុគ្គលណាដែលធ្វើសកម្មភាពខុសច្បាប់។

ឯកឧត្តម វ៉ី សំណាង បានថ្លែងបន្តថា ​ការប្រមូលផ្ដុំធ្វើបាតុកម្ម កូដកម្មទំលាក់រាជរដ្ឋាភិបាល​ស្របច្បាប់​ដោយ​យក​គម្រូ​តាមប្រទេសបង់ក្លាដេស​ វាមិនអាចសម្រេចទៅបានតាមផែនការ​របស់​ក្រុមអគតិនោះទេ​ ព្រោះប្រទេសកម្ពុជា​បច្ចុប្បន្នដឹកនាំដោយរាជរដ្ឋាភិបាលស្របច្បាប់ ប្រទេសជាតិ​កំពុងតែមានការអភិវឌ្ឍលើគ្រប់វិស័យ ​មានសុខសន្តិភាព​ មានសិទ្ធិសេរីភាពគ្រប់បែបយ៉ាង ប្រជាពលរដ្ឋច្រើនលើសលប់គាំទ្រការដឹកនាំ​របស់រាជរដ្ឋាភិបាល ដូច្នោះប្រសិនបើមានការ​ប្រមូលផ្ដុំ​ខុសច្បាប់​ណាមួយ ​ដែល​ប៉ះពាល់ដល់សន្តិសុខសាធារណៈ ​ក្នុងនាម​មន្រ្តីអនុវត្តន៍ច្បាប់​យើង​នឹងចាត់​វិធានការភ្លាមៗ​ដើម្បីការពារសុខសុវត្ថិភាព​ជូន​ប្រជាពលរដ្ឋ និងប្រទេសជាតិ៕