ប្រធានាធិបតី អ៊ុយក្រែនលោក Volodymyr Zelenskyy និយាយថា កងកម្លាំងរបស់ប្រទេសលោកបានគ្រប់គ្រងទីតាំងលំនៅចំនួន៧៤កន្លែង នៅតំបន់ Kursk ភាគខាងលិចប្រទេសរុស្ស៊ី។ 

យោធាអ៊ុយក្រែន បានបើកការវាយលុកចូលទៅក្នុងទីក្រុង Kursk ចាប់តាំងពីថ្ងៃទី៦ ខែសីហា។ អ៊ុយក្រែន អះអាងថា ទឹកដីរុស្ស៊ីប្រហែល ១.០០០ គីឡូម៉ែត្រក្រឡា បច្ចុប្បន្ននេះ ស្ថិតនៅក្រោមការគ្រប់គ្រងរបស់ខ្លួន។

កាលពីថ្ងៃអង្គារ លោក Zelenskyy បានសរសេរនៅលើប្រព័ន្ធផ្សព្វផ្សាយសង្គមថា ទោះបីជាមានការប្រយុទ្ធដ៏លំបាក និងខ្លាំងក្លាក៏ដោយ កងកម្លាំងរបស់យើង នៅតែបន្តរុលចូលទៅមុខ នៅក្នុងតំបន់ Kursk។ លោក បាននិយាយថា លោកកំពុងទាក់ទងជាប់ជានិច្ចជាមួយមេបញ្ជាការ លោក Oleksandr Syrskyi ហើយការត្រៀមរៀបចំសម្រាប់ជំហានបន្ទាប់របស់យើង នៅតែបន្ត។ 

ទោះជាយ៉ាងណា លោក Zelenskyy ពុំបានបញ្ជាក់លម្អិតអំពី «ជំហានបន្ទាប់នោះទេ»។

អ្នកនាំពាក្យក្រសួងការបរទេសអ៊ុយក្រែន បាននិយាយទៅកាន់អ្នកសារព័ត៌មាន កាលពីថ្ងៃអង្គារថា អ៊ុយក្រែន មិនចាប់អារម្មណ៍ក្នុងការដណ្តើមយកទឹកដីនៅក្នុងតំបន់ Kursk នោះទេ ប៉ុន្តែអ៊ុយក្រែនចង់ការពារជីវិតប្រជាជនរបស់ខ្លួន។ 

អ្នកនាំពាក្យរូបនេះ បានបញ្ជាក់ថា ប្រតិបត្តិការឆ្លងព្រំដែននេះ គឺមានគោលបំណងការពារអ៊ុយក្រែន ពីការវាយប្រហាររបស់រុស្ស៊ី ដែលធ្វើឡើងចេញពីតំបន់ Kursk និងមិនអនុញ្ញាតឱ្យរុស្ស៊ី ដាក់ពង្រាយអង្គភាពបន្ថែមទៀត ទៅកាន់តំបន់ Donetsk ភាគខាងកើតរបស់អ៊ុយក្រែន ដែលការប្រយុទ្ធគ្នាខ្លាំង នៅតែបន្តនោះទេ។