​បាល់ទាត់៖ ​ខ្សែប្រយុទ្ធ​ព័រទុយហ្កាល់ Cristiano Ronaldo បានចាប់ផ្តើម​ហ្វឹកហាត់​ជា​លើកដំបូង​ជាមួយ​ក្រុម​បិសាច​ក្រហម Manchester United តាំងពី​ផ្លាស់​ពី Juventus ក្នុងតម្លៃ ១៩.៨​លាន​ផោន​។ ​​Cristiano Ronaldo ទំនងជា​នឹង​អាច​បង្ហាញខ្លួន​លើកដំបូង​នៃ​ការវិល​ត្រលប់​មកវិញ​នៅពេល Manchester United ទទួល Newcastle United ចុង​សប្តាហ៍​នេះ​។​

​​ក្នុង​ការវិល​មកវិញ​នេះកីឡាករ​វ័យ ៣៦ឆ្នាំ​រូបនេះ​នឹង​បើក​ទំព័រ​នៃ​អាជីព​របស់ខ្លួន ​រួម​ជាមួយនឹង​លទ្ធភាព​ដែល​គេ​អាច​បំបែក​កំណត់ត្រា​ចំនួន ៧​។ ទី១ ក្នុង​អាជីព​ដំបូង​ជាមួយ Manchester United លើក​មុន Ronaldo ស៊ុត​បញ្ចូល​ទី​បាន ៨៤គ្រាប់​ក្នុងការ​បង្ហាញខ្លួន ១៩៦ នៅ English Premier League និង​ឈ្នះ​ពាន​លី​គ​កំពូល​អង់គ្លេស​នេះ​ចំនួន ៣​។ ចំណែក​នៅ Real Madrid គេ​បាន​ស៊ុត​បញ្ចូល​ទី​ចំនួន ៣១១គ្រាប់​ក្នុងការ​បង្ហាញខ្លួន ២៩២ប្រកួត​នៅ La Liga​។ មាន​ន័យថា​ គេ​ត្រូវការ ១៦គ្រាប់​ទៀត​នៅ Premier League ដើម្បី​ក្លាយជា​កីឡា​ករទី១ ដែល​ស៊ុត​បញ្ចូល​ទី​ចាប់ពី ១០០គ្រាប់​ក្នុង​អាជីព​នៅ​លី​គ​កំពូល​ចំនួន​ពីរ​។ ទី២ Ronaldo ធ្លាប់​កាន់​កំណត់ត្រា​អ្នក​ស៊ុត​បញ្ចូល​ទី​ច្រើនជាងគេ​ក្នុង​មួយ​រដូវ​កាល​ចំនួន ៣១គ្រាប់​ពេល​នៅ Manchester United លើក​មុន​ តែ​ក្រោយមក​កំណត់ត្រា​នោះ​ក៏ត្រូវ​បាន​បំបែក​ដោយ​ខ្សែប្រយុទ្ធ Liverpool, Mohamed Salah នៅ​រដូវ​កាល ២០១៧-១៨ ដោយ​កីឡាករ​អាស៊ី​ប​រូបនេះ​រកបាន ៣២គ្រាប់ មានន័យ​ថាបើ Ronaldo រកបាន​រដូវ​កាល​នេះ ៣៣គ្រាប់​គេ​នឹង​អាច​បំបែក​កំណត់ត្រា​កីឡាករ​ស៊ុត​បញ្ចូល​ទី​ច្រើនជាងគេ​ក្នុង​មួយ​រដូវ​កាល​នៅ English Premier League សារជាថ្មី​។

​​ទី៣ នៅ​រដូវ​កាល ២០០៧-០៨ Ronaldo រកបាន​នៅ EPL ៣១គ្រាប់ ​និង ១១គ្រាប់​ទៀត​នៅ​ពាន​ផ្សេងៗ​ដែល​សរុប ៤២គ្រាប់​ក្នុង​រដូវ​កាលនោះ​។ លោក Danis Law គឺជា​អ្នក​កាន់​កំណត់ត្រា​នៅ Manchester United ក្នុងនាម​ជា​កីឡាករ​ដែល​ស៊ុត​បញ្ចូល​ទី​ច្រើនជាងគេ​ក្នុង​មួយ​រដូវ​កាល​សរុប ៤៦គ្រាប់​ដែល​ចំនួន​នេះ​ក៏​ជា​គោលដៅ​ដែល Ronaldo អាច​នឹង​បំបែក​បានដែរ​។​ ​​ទី៤ ក្នុង​វ័យ ៣៦ឆ្នាំ​នាពេល​បច្ចុប្បន្ន Ronaldo មិនបាន​បង្ហាញ​ពី​ការធ្លាក់ចុះ​នៃ​សមត្ថភាព និង​គ្រាប់​បាល់​របស់ខ្លួន​ដែរ​ប៉ុន្មាន​ឆ្នាំ​ចុងក្រោយ​នេះ​។ ប្រសិនបើ Ronaldo អាច​ឈ្នះ​ស្បែកជើង​មាស​នៅ EPL បាន​រដូវ​កាល​នេះ​ គេ​នឹង​អាច​បំបែក​កំណត់ត្រា​កីឡាករ​វ័យ​ចំណាស់​បំផុត​ដែល​ធ្វើបាន​បែបនេះ បំបែក​កំណត់ត្រា​ដែល​កំពុង​កាន់កាប់​ដោយ Jamie Vardy ដែល​ធ្វើបាន​កាល​ពី​ឆ្នាំ២០២០ ក្នុង​វ័យ ៣៣ឆ្នាំ​។ ​​ទី៥ Ronaldo ឈ្នះ​ពាន UEFA Champions League លើក​ដំបូង​​ក្នុង​អាជីព​ជាមួយ Manchester United នៅ​ឆ្នាំ២០០៨ និង​ឆ្នាំ២០០៩ ឡើងដល់​វគ្គ​ផ្តាច់​ព្រ័ត្រ​ម្តងទៀត​តែ​ចាញ់ Barcelona នៅ​វគ្គ​ផ្តាច់ព្រ័ត្រ មុនពេល​​ឈ្នះ​ពាន​នេះ ៤លើក​ជាមួយ Real Madrid​។ បើ​ជួយ ManU ឈ្នះ​ពាន​ម្តងទៀត​គេ​នឹង​ក្លាយជា​កីឡា​ករទី១ ក្នុង​រជ្ជកាល Champions League ដែល​ឈ្នះ​ពាន​នេះ​ដល់​ទៅ ៦លើក​ក្នុង​អាជីព​។

ទី៦ Ruud van Nistelrooy បច្ចុប្បន្ន​គឺជា​អ្នក​ស៊ុត​បញ្ចូល​ទី​ច្រើនជាងគេ​របស់ Manchester United នៅ UCL ដោយមាន​សរុប ៣៥គ្រាប់​ក្នុងការ​បង្ហាញខ្លួន ៤៣លើក​។ អាជីព​ជាមួយ ManU ដំបូង Ronaldo រកបាន​នៅ UCL ស្រាប់ ១៥គ្រាប់ហើយ ប្រសិនបើ​រកបាន ២១គ្រាប់​ទៀត​គេ​នឹង​អាច​បំបែក​កំណត់ត្រា​នេះ​មួយទៀត​។ ​​ទី៧ Wayne Rooney គឺជា​កីឡាករ​ដែល​ស៊ុត​បញ្ចូល​ទី​នៅ Manchester United ច្រើន​បំផុត​ក្នុង​ប្រវត្តិសាស្ត្រ​សរុប ២៥៣គ្រាប់ ខណៈ​បច្ចុប្បន្ន Ronaldo ស៊ុត​បាន ១១៨គ្រាប់​នៅ ManU តើ​អ្នកណា​ទៅ​ដឹងថា Ronaldo នឹង​លេង​ដល់ពេលនេះ​ណា ហើយ​អ្នកណា​ទៅ​ដឹងថា ១៣៦គ្រាប់​ទៀត​គេ​រកបាន​រឺ​អត់ បើ​រកបាន​មែន​គេ​នឹង​បំបែក​កំណត់ត្រា​នេះ​មួយទៀត​៕

​អត្ថបទ​៖​នាង សុភា​វុ​ធ