បេសកកម្មអចិន្ត្រៃយ៍របស់អ៊ីរ៉ង់ប្រចាំអង្គការសហប្រជាជាតិ បាននិយាយថា អ៊ីរ៉ង់ មិន ហើយនឹងមិនចូលរួមក្នុងកិច្ចចរចាណាមួយរវាងចលនាហាម៉ាសប៉ាឡេស្ទីន និងអ៊ីស្រាអែលលើបទឈប់បាញ់ នៅតំបន់ហ្កា ហ្សាស្ទ្រីប និងការដោះលែងចំណាប់ថ្នូរ ដែលកំពុងត្រូវបានឃុំឃាំង នៅក្នុងដែនដីនោះទេ។

មុននេះ ទីភ្នាក់ងារសារព័ត៌មានរ៉យទ័រដែលដកស្រង់ប្រភព បាននិយាយថា ជាលើកដំបូង ចាប់តាំងពីមានការកើនឡើងនៅក្នុងដែនដីដែលមានជម្លោះ អ៊ីរ៉ង់ កំពុងពិចារណាបញ្ជូនអ្នកតំណាងម្នាក់ទៅកិច្ចចរចាបទឈប់បាញ់។ យោងតាមទីភ្នាក់ងារព័ត៌មាន «អ្នកតំណាងនឹងមិនចូលរួមកិច្ចប្រជុំដោយផ្ទាល់ទេ ប៉ុន្តែនឹងចូលរួមក្នុងការពិភាក្សានៅក្រៅវេទិកាកិច្ចប្រជុំ ដើម្បីរក្សាទំនាក់ទំនងការទូត» ជាមួយសហរដ្ឋអាមេរិក    ខណៈពេលដែលការចរចា កំពុងដំណើរការ»។

បេសកកម្មរបស់អ៊ីរ៉ង់ទៅកាន់អង្គការសហប្រជាជាតិនៅទីក្រុងញូវយ៉ក បានប្រាប់អ្នកយកព័ត៌មានថា ទីក្រុងតេអេរ៉ង់ មិន ហើយ នឹងមិនចូលរួមក្នុងការចរចាបែបនេះទេ។

ភាពតានតឹងមួយទៀត នៅមជ្ឈិមបូព៌ា បានកើតឡើង បន្ទាប់ពីមានការធ្វើឃាតយ៉ាងឃោរឃៅលើប្រធានការិយាល័យនយោបាយរបស់ហាម៉ាស លោក អ៊ីស្មេ ហានីយេ ក្នុងទីក្រុងតេអេរ៉ង់ និងការសម្លាប់មេបញ្ជាការយោធាជាន់ខ្ពស់របស់ក្រុមហេសបូឡា លោក Fuad Shukr ក្នុងទីក្រុងបេរូត។ ប្រទេសអ៊ីរ៉ង់ ក្រុមហាម៉ាស និងក្រុមហេសបូឡា ឲ្យអ៊ីស្រាអែល ជាអ្នកទទួលខុសត្រូវ ហើយបានអះអាងថា ការវាយប្រហារនឹងត្រូវបានឆ្លើយតបដោយការសងសឹក។ មន្ត្រីអ៊ីស្រាអែល មិនធ្វើអត្ថាធិប្បាយអំពីការស្លាប់របស់លោក ហានីយេទេ ខណៈដែលអះអាងថា ការវាយប្រហារលើលោក Shukr គឺជាការឆ្លើយតបទៅនឹងការវាយប្រហារទៅលើសហគមន៍ Druze នៃទី Majdal Shams នៅតំបន់ខ្ពង់រាប Golan Heights ដែលគ្រប់គ្រងដោយអ៊ីស្រាអែល ដែលបានសម្លាប់មនុស្ស ១២ នក់។ ទោះជាយ៉ាងណា ក្រុមហេសបូឡា បានបដិសេធការជាប់ពាក់ព័ន្ធនឹងការវាយប្រហារនេះ។