ក្រុមធ្វើយុទ្ធនាការរបស់បេក្ខជនប្រធានាធិបតីនៃគណបក្សប្រជាធិបតេយ្យ លោកស្រី Kamala Harris កាលពីថ្ងៃអង្គារ (ទី១៣ ខែសីហា) បាននិយាយថា ក្រុមត្រូវបានវាយប្រហារដោយពួកចោរព័ត៌មានវិទ្យាបរទេស ដោយការអះអាងនេះកើតមានឡើងប៉ុន្មានថ្ងៃបន្ទាប់ពីក្រុមយុទ្ធនាការរបស់គូប្រជែង លោក Donald Trump បានលើកឡើងថា ពួកគេត្រូវបានវាយប្រហារដោយអ៊ីរ៉ង់។

មន្ត្រីយុទ្ធនាការរបស់លោកស្រី Harris បានប្រាប់សារព័ត៌មាន AFP ថា៖ «នៅក្នុងខែកក្កដា ក្រុមយុទ្ធនាការផ្នែកច្បាប់ និងសន្តិសុខ ត្រូវបានជូនដំណឹងដោយ FBI ថា យើងត្រូវបានគេកំណត់គោលដៅដោយប្រតិបត្តិការឥទ្ធិពលតួអង្គបរទេស។ យើងមានវិធានការសន្តិសុខតាមអ៊ីនធឺណិតដ៏រឹងមាំ ហើយមិនបានដឹងពីការបំពានលើសុវត្ថិភាពណាមួយនៃប្រព័ន្ធរបស់យើង ដែលបណ្តាលមកពីកិច្ចខិតខំប្រឹងប្រែងទាំងនោះឡើយ»។

យ៉ាងណាក្ដី យុទ្ធនាការនេះមិនបានបង្ហាញថា អំណាចបរទេសណាមួយដែលត្រូវបានគេជឿថា នៅពីក្រោយការប៉ុនប៉ងនេះនោះទេ ប៉ុន្តែបាននិយាយថា ខ្លួននៅតែមានទំនាក់ទំនងជាមួយភ្នាក់ងារអនុវត្តច្បាប់។

ចំណែកក្រសួងការបរទេសអាមេរិក កាលពីថ្ងៃទី១២ ខែសីហា បានព្រមានអ៊ីរ៉ង់ អំពីផលវិបាក ជុំវិញការជ្រៀតជ្រែកការបោះឆ្នោត បន្ទាប់ពីមានការប្រកាសពីក្រុមយុទ្ធនាការរបស់លោក Trump ដែលថា ខ្លួនត្រូវបានលួចចូលប្រព័ន្ធព័ត៌មានវិទ្យា៕