រដ្ឋមន្ត្រីសន្តិសុខជាតិអ៊ីស្រាអែល លោក Itamar Ben-Gvir បានអំពាវនាវដល់អាជ្ញាធររបស់ប្រទេសនេះកុំឲ្យបញ្ជូនគណៈប្រតិភូ «ទៅពិភាក្សានៅទីក្រុងដូហា ឬទីក្រុងគែរ» ដើម្បីព្យាយាមធ្វើកិច្ចព្រមព្រៀងស្តីពី តំបន់ហ្កាហ្សា ខណៈដែលលោកបានប្រកាសជំហររបស់លោកយ៉ាងច្បាស់ថា ចលនាហាម៉ាសប៉ាឡេស្ទីន គួរត្រូវបាន«កម្ទេច»ទាំងស្រុង។

លោកបាននិយាយនៅក្នុងសុន្ទរកថាតាមវីដេអូមួយដែលផ្សាយដោយសេវាសារព័ត៌មាននៃគណបក្ស Otzma Yehudit ស្តាំនិយមជ្រុលរបស់លោកថា អ៊ីស្រាអែល «ត្រូវតែទទួលបានជ័យជម្នះ» ដែលជាលទ្ធផលនៃប្រតិបត្តិការយោធារបស់ខ្លួននៅក្នុងតំបន់ហ្កាហ្សាស្ទ្រីប និងកម្ចាត់ក្រុមក្រុមហាម៉ាសឲ្យអស់។

កាលពីថ្ងៃទី៩ ខែសីហា មេដឹកនាំនៃប្រទេសអេហ្ស៊ីប កាតា និងសហរដ្ឋអាមេរិក បានចេញផ្សាយសេចក្តីថ្លែងការណ៍រួមមួយ ដោយជំរុញឲ្យអ៊ីស្រាអែល និងក្រុមហាម៉ាស បន្តការចរចាស្តីពីបទឈប់បាញ់ នៅតំបន់ហ្កាហ្សាស្ទ្រីបនៅទីក្រុងដូហា ឬទីក្រុងគែរ នៅថ្ងៃទី ១៥ ខែសីហា។ 

ក្រុមអ្នកសម្រុះសម្រួល ក៏បាននិយាយផងដែរថា ពួកគេបានត្រៀមខ្លួនរួចជាស្រេច ដើម្បីបង្ហាញសេចក្តីព្រាងកិច្ចព្រមព្រៀងចុងក្រោយ ដោយផ្អែកលើគោលការណ៍កំណត់ដោយប្រធានាធិបតីអាមេរិកលោក Joe Biden និងគាំទ្រដោយសេចក្តីសម្រេចលេខ ២៧៣៥ របស់ក្រុមប្រឹក្សាសន្តិសុខអង្គការសហប្រជា   ជាតិ។