ក្រុមប្រដាប់អាវុធជាខ្សែបណ្តាញរបស់ក្រុមជីវពលអ៊ីស្លាមហាម៉ាស់ប៉ាឡេស្ទីន ដែលគេស្គាល់ថាជាកងពលតូច al-Qassam បានបញ្ចេញរូបភាពវីដេអូឃ្លីបឃើញរ៉ុក្កែតដែលពួកគេអះអាងថា បានបាញ់សំដៅលើទីក្រុងតែល អាវីវ របស់អ៊ីស្រាអែល ។

កាលពីថ្ងៃអង្គារ រ៉ុក្កែត ២គ្រាប់ ត្រូវបានបាញ់សំដៅលើទីក្រុងតែល អាវីវ ជាលើកដំបូង ចាប់តាំងពីខែឧសភា ។ គ្មានសេចក្តីរាយការណ៍ពីគ្រោះថ្នាក់នោះទេ នៅអ៊ីស្រាអែល ។

យោងតាមការអះអាងរបស់យោធាអ៊ីស្រាអែល បានឲ្យដឹងថា រ៉ុក្កែតមួយគ្រាប់ បានធ្លាក់ចូលសមុទ្រ ហើយរ៉ុក្កែត ១គ្រាប់ទៀត ពុំបានហោះដល់ទឹកដីអ៊ីស្រាអែលនោះទេ ។ នៅថ្ងៃតែមួយនោះ ការវាយប្រហារតាមច្រកអាកាសរបស់អ៊ីស្រាអែល បានសម្លាប់ជនប៉ាឡេស្ទីនយ៉ាងហោច ១៩នាក់ នៅតំបន់ហ្កាហ្សា ។

អ៊ីស្រាអែល និយាយថា ពួកគេបានឆ្លើយតបការបាញ់រ៉ុក្កែតរបស់ក្រុមហាម៉ាស់លើទីក្រុងតែល អាវីវ ហើយនិងបានវាយប្រហារទីតាំងបាញ់រ៉ុក្កែត ហើយក្រុមជីវពល ដែលស្ថិតនៅក្នុងចំណោមគោលដៅយោធា ៤០កន្លែង ក្នុងរយៈពេល ២៤ម៉ោងកន្លងមកនេះ រួមទាំងតំបន់ភាគកណ្តាលហ្កាហ្សា ទីក្រុង Khan Younis និងភាគខាងលិចទីក្រុង Rafah នៅភាគខាងត្បូងហ្កាហ្សា ។

ដោយឡែក ក្រុមប្រដាប់អាវុធហាម៉ាស់ និងក្រុមជីហាដអ៊ីស្លាម និយាយថា ពួកគេបានវាយប្រហារកងកម្លាំងអ៊ីស្រាអែល នៅតាមតំបន់ជាច្រើន ស្របពេលដែលក្រុមមន្រ្តីសុខភាពប៉ាឡេស្ទីន និយាយថា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោច ១៤នាក់ នៅភាគកណ្តាល និងភាគខាងត្បូងតំបន់ហ្កាហ្សា ៕