មេដឹកនាំតាលីបង់របស់ប្រទេសអាហ្វហ្គានីស្ថាន បានប្រារព្ធពិធីកាន់អំណាចរយៈពេល ៣ឆ្នាំ នៅថ្ងៃទី១៤ ខែសីហានេះ ជាមួយនឹងទស្សនីភាពជាច្រើន ដោយក្នុងនោះមានទាំងការបង្ហាញព្យុហយាត្រាយោធា ដែលធ្វើឡើងដើម្បីជាការផ្ដល់កិត្តិយសដល់គ្រាប់បែកផលិតក្នុងស្រុករបស់ពួកគេដែលត្រូវបានប្រើប្រាស់ក្នុងសង្គ្រាម យន្តហោះចម្បាំង និងកងកម្លាំងសន្តិសុខដែលដើរជាក្បួន។

ក្នុងពិធីនោះ កងកម្លាំងប្រដាប់អាវុធរបស់តាលីបង់បានទាញរថក្រោះ និងបំណែកកាំភ្លើងធំសម័យសូវៀតឆ្លងកាត់អតីតមូលដ្ឋានទ័ពអាកាសអាមេរិក នៅទីក្រុង Bagram ជាទីដែលមន្ត្រីការទូតចិន និងអ៊ីរ៉ង់ មានវត្តមាននៅក្នុងចំណោមមនុស្សរាប់រយនាក់ដែលបានទៅជួបជុំគ្នា ដើម្បីធ្វើព្យុហយាត្រា និងថ្លែងសុន្ទរកថា។

គួរបញ្ជាក់ថា កងកម្លាំងតាលីបង់ បានដណ្តើមកាន់កាប់រដ្ឋធានីកាប៊ុល នៅថ្ងៃទី១៥ ខែសីហា ឆ្នាំ២០២១ បន្ទាប់ពីរដ្ឋាភិបាលដែលគាំទ្រដោយសហរដ្ឋអាមេរិក បានដួលរលំ ហើយមេដឹកនាំរបស់ប្រទេស បានភៀសខ្លួនទៅរស់នៅនិរទេសខ្លួន។ ពិធីប្រារព្ធខួបនេះត្រូវបានធ្វើឡើងមួយថ្ងៃមុននេះតាមប្រតិទិនរបស់អាហ្វហ្គានីស្ថាន។

តែយ៉ាងណាក្ដី រដ្ឋាភិបាលតាលីបង់ នៅតែមិនត្រូវបានទទួលស្គាល់ដោយរដ្ឋណាមួយឡើយ ដោយការរឹតត្បិតលើស្ត្រីដែលរងផលប៉ះពាល់យ៉ាងធ្ងន់ធ្ងរដោយសារគោលនយោបាយដែលអង្គការសហប្រជាជាតិបានហៅថា «ការរើសអើងយេនឌ័រ» នោះ នៅតែជាចំណុចរារាំងដ៏ធំជាងគេ សម្រាប់ការទទួលស្គាល់នោះ៕