ប្រភពការទូតទួរគី នៅថ្ងៃពុធ (ទី១៤ ខែសីហា) នេះ បានប្រាប់ឲ្យដឹងថា មន្ត្រីជាន់ខ្ពស់របស់ប្រទេសទួរគី និងអ៊ីរ៉ាក់ នឹងធ្វើកិច្ចចរចាកម្រិតខ្ពស់ នៅទីក្រុង Ankara នាថ្ងៃព្រហស្បតិ៍ (ទី១៥ ខែសីហា) ដើម្បីធ្វើឲ្យកិច្ចសហប្រតិបត្តិការលើបញ្ហាសន្តិសុខប្រសើរឡើង។

ក្នុងរយៈពេលប៉ុន្មានឆ្នាំចុងក្រោយនេះ ប្រទេសជិតខាងទាំង២ បានជាប់នៅក្នុងជម្លោះ ដោយសារប្រតិបត្តិការយោធាឆ្លងព្រំដែនរបស់ទីក្រុង Ankara ប្រឆាំងនឹងក្រុមសកម្មប្រយុទ្ធឃឺដរបស់គណបក្សមិនស្របច្បាប់ គឺគណបក្ស Kurdistan Workers Party (PKK) ដែលមានមូលដ្ឋាននៅតំបន់ភ្នំភាគខាងជើងនៃប្រទេសអ៊ីរ៉ាក់។

អ៊ីរ៉ាក់បានលើកឡើងថា ប្រតិបត្តិការនេះ គឺជាការរំលោភលើអធិបតេយ្យភាពរបស់ខ្លួន ប៉ុន្តែទីក្រុង Ankara និយាយថា ពួកគេចាំបាច់ត្រូវធ្វើ ដើម្បីការពារខ្លួន។

ទំនាក់ទំនងមានភាពប្រសើរឡើងវិញបន្តិច ចាប់តាំងពីឆ្នាំមុន នៅពេលដែលភាគីទាំង២ បានយល់ព្រមធ្វើកិច្ចចរចាកម្រិតខ្ពស់ អំពីបញ្ហាសន្តិសុខ ហើយបន្ទាប់ពីមានដំណើរទស្សនកិច្ច កាលពីខែមេសា ពីសំណាក់ប្រធានាធិបតីទួរគី លោក Tayyip Erdogan ទៅកាន់ទីក្រុង Baghdad ជាកន្លែងដែលលោកបាននិយាយថា ទំនាក់ទំនងបានឈានដល់ដំណាក់កាលថ្មីមួយ៕