រដ្ឋាភិបាលយេម៉ែនបានអំពាវនាវឲ្យអង្គការសហប្រជាជាតិ (UN) ផ្លាស់ទៅទីក្រុងទី២ របស់ខ្លួន គឺទីក្រុង Aden បន្ទាប់ពីក្រុមឧទ្ទាមហ៊ួទី បានដណ្តើមយកការិយាល័យ នៅក្នុងរដ្ឋធានីសាណា និងបានឃុំខ្លួនបុគ្គលិករាប់សិបនាក់មកពីអង្គការអន្តរជាតិនានា។

តាមរយៈបណ្ដាញសង្គម X រដ្ឋមន្ត្រីក្រសួងព័ត៌មាន លោក Moammar al-Eryani កាលពីថ្ងៃអង្គារ (ទី១៣ ខែសីហា) បានប្រាប់ឲ្យដឹងថា៖ «យើងសូមរំលឹកឡើងវិញនូវការអំពាវនាវដល់បេសកកម្មរបស់អង្គការសហប្រជាជាតិ ទីភ្នាក់ងារអង្គការសហប្រជាជាតិទាំងអស់ និងអង្គការអន្តរជាតិនានាដែលកំពុងប្រតិបត្តិការ នៅក្នុងប្រទេសយេម៉ែន ឲ្យផ្លាស់ភ្លាមៗទៅកាន់ទីស្នាក់ការរបស់ពួកគេ ប្រចាំនៅរដ្ឋបណ្ដោះអាសន្ន គឺ Aden និងតំបន់រំដោះផ្សេង»។ 

គួរបញ្ជាក់ថា ក្រុមហ៊ួទីដែលគាំទ្រដោយអ៊ីរ៉ង់ បានវាយលុករដ្ឋធានីសាណា ក្នុងឆ្នាំ២០១៤ និងបានកាន់កាប់ដោយភាគច្រើនលើទីក្រុងដែលមានប្រជាជនរស់នៅច្រើន ដោយបង្ខំឲ្យរដ្ឋាភិបាលដែលត្រូវបានទទួលស្គាល់ជាអន្តរជាតិភៀសខ្លួនទៅកាន់ទីក្រុង Aden។ ក្រុមចម្រុះដឹកនាំដោយប្រទេសអារ៉ាប៊ីសាអូឌីតបានធ្វើអន្តរាគមន៍ ដើម្បីគាំទ្ររដ្ឋាភិបាលដែលរងការគំរាមកំហែងនៅឆ្នាំបន្ទាប់។

កាលពីថ្ងៃអង្គារ ការិយាល័យឧត្តមស្នងការ UN ទទួលបន្ទុកសិទ្ធិមនុស្ស បាននិយាយថា ពួកឧទ្ទាមបានចូលទៅក្នុងការិយាល័យរបស់ខ្លួន នៅទីក្រុងសាណា កាលពីថ្ងៃទី៣ ខែសីហា ហើយបានបង្ខំបុគ្គលិករបស់ខ្លួនឲ្យប្រគល់សោការិយាល័យ និងទ្រព្យសម្បត្តិទាំងអស់របស់ការិយាល័យ។

បើយោងតាម UN បានឲ្យដឹងថា កាលពីខែមិថុនា ក្រុមឧទ្ទាមមួយនេះ បានចាប់ខ្លួនបុគ្គលិក UN ចំនួន ១៣នាក់ បុគ្គលិកស្ថានទូត និងបុគ្គលិកអង្គការក្រៅរដ្ឋាភិបាលជាង ៥០នាក់។ បុគ្គលិក ២នាក់ផ្សេងទៀតមកពីការិយាល័យសិទ្ធិមនុស្សរបស់ UN ត្រូវបានឃុំខ្លួនក្នុងខែវិច្ឆិកា ឆ្នាំ២០២១ និងខែសីហា ឆ្នាំ២០២៣។

ក្រុមហ៊ួទី បាននិយាយថា ពួកគេបានចាប់ខ្លួនសមាជិកនៃ «ក្រុមចារកម្មអ៊ីស្រាអែល-អាមេរិក» ដែលប្រតិបត្តិការក្រោមការក្លែងបន្លំជារូបភាពអង្គការមនុស្សធម៌។ តែ UN បានបដិសេធយ៉ាងដាច់អហង្ការ ចំពោះការចោទប្រកាន់នេះ៕