បាល់ទាត់៖ លីគកំពូលកម្ពុជាបានឈានដល់ការប្រកួតសន្សំពិន្ទុសប្ដាហ៍ទី១៣ ដែលជាសប្ដាហ៍ចុងក្រោយក្នុងជុំទី១ នៅថ្ងៃទី១១-១២ ខែកញ្ញា ឆ្នាំ២០២១ នេះដោយគ្រោងនឹងមាន ៦គូពេញក្នុងនោះមាន ២គូត្រូវប្រកួតនៅភ្នំពេញ ខណៈ ៤គូទៀតប្រកួតនៅតាមបណ្ដាខេត្ត។
សម្រាប់កម្មវិធីប្រកួតថ្ងៃទី១១-កញ្ញាគឺមាន ៣គូរួមមានក្រុមនគរបាលជាតិបន្ដបើកទ្វារទីលាន 7NG ទទួលក្រុមព្រះខ័នរាជស្វាយរៀង ខណៈក្រុមគិរីវង់សុខសែនជ័យប៉ះក្រុមណាហ្គាវើលដ៏ ដែលគ្រោងប្រកួតនាថ្ងៃទី១២-កញ្ញាត្រូវលើកមកប្រកួតថ្ងៃសៅរ៍ស្អែកនេះដែរ និង ១គូទៀតគឺក្រុមជើងឯក ៤សម័យបឹងកេតបើកទ្វារផ្ទះទទួលក្រុមកំពូលតារាងវិសាខា នៅកីឡដ្ឋានខេមបូឌាអ៊ែរវ៉េវេលាម៉ោង ៣៖៣០នាទីរសៀលដូចៗគ្នា។ ចំណែកការប្រកួតថ្ងៃទី១២-កញ្ញាមាន ៣គូដូចគ្នា រួមមានខេត្តព្រៃវែងជួបក្រុមភ្ញៀវអាស៊ីអឺរ៉ុប ខណៈក្រុមអគ្គិសនីកម្ពុជាត្រូវជួបក្រុមភូមិផងរបងជាមួយ គឺសមាគមកីឡាបាល់ទាត់កងយោធពលខេមរភូមិន្ទនៅកីឡដ្ឋានអគ្គិសនីកម្ពុជា និងគូពិសេស ក្រុមអង្គរថាយហ្គឺរត្រូវជួបក្រុមសិង្ហក្រហមភ្នំពេញក្រោន នៅកីឡដ្ឋាន SRU ខេត្តសៀមរាប ដែលការប្រកួតទាំង ៣គូនេះនឹងដំណើរការប្រកួតនាម៉ោង ៣៖៣០នាទីរសៀលដូចៗគ្នា។
គួរដឹងថា នេះគឺជាសប្ដាហ៍ចុងក្រោយក្នុងជុំទី១ នៃលីគកំពូលកម្ពុជាឆ្នាំ២០២១ ប៉ុន្ដែការប្រកួតសន្សំពិន្ទុជុំទី១ នេះនៅមិនទាន់បញ្ចប់នោះទេ ពោលគឺនៅសល់ ២ប្រកួតទៀតដែលត្រូវបានពន្យារពេលដោយសារបញ្ហាកូវីដ-១៩ នាពេលកន្លងមក ហើយត្រូវប្រកួតបញ្ចប់នាថ្ងៃទី១៥ ខែកញ្ញា។ តែក្រោយចប់ជុំទី១ លីគកំពូលកម្ពុជាមិនមានការសម្រេចនោះទេ ដោយនឹងបន្ដការប្រកួតជុំទី២ តែម្ដងនៅថ្ងៃទី១៨ ខែកញ្ញាខាងមុខនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
