នាយករដ្ឋមន្ត្រីជប៉ុន ដែលលាលែងពីតំណែង លោក ហ្វ៊ូមីអូ គីស៊ីដា (Fumio Kishida) កាលពីថ្ងៃពុធ (១៤ សីហា) បានជំរុញសមាជិកបក្សប្រជាធិបតេយ្យសេរី (LDP) របស់លោកឱ្យទទួលយកការផ្លាស់ប្តូរ និងស្វះស្វែងរកបេក្ខជនដែលនឹងជំរុញប្រជាប្រិយភាពរបស់គណបក្សកំពុងកាន់អំណាចមួយនេះ ជាមួយនឹងការរំពឹងទុកនៃការបោះឆ្នោតមិនច្បាស់លាស់។

លោក Kishida វ័យ ៦៧ឆ្នាំបានប្រកាសថា លោកនឹងមិនឈរឈ្មោះសម្រាប់ការបោះឆ្នោតឡើងវិញជាប្រធានគណបក្សប្រជាធិបតេយ្យសេរី LDP នៅខែក្រោយនេះទេ ស្របពេលមានអត្រាការគាំទ្រសាធារណៈទាបបំផុតដែលមិនធ្លាប់មានក្នុងកំណត់ត្រារបស់បក្ស និងរឿងអាស្រូវជាច្រើនក្នុងរយៈពេលប្រាំបីទសវត្សរ៍កន្លងមកនេះ។

លោក Kishida បាននិយាយនៅក្នុងសន្និសីទសារព័ត៌មានថា «វាចាំបាច់ណាស់ដើម្បីបង្ហាញប្រជាជនថាបក្ស LDP បានវិវត្ត និងបានកើតជាថ្មីហើយ»។ នៅក្នុងការស្ទង់មតិមួយដែលចេញផ្សាយដោយទូរទស្សន៍រដ្ឋ NHK ក្នុងខែនេះបង្ហាញថា មានតែអ្នកឆ្លើយតបមួយភាគបួនប៉ុណ្ណោះដែលបាននិយាយថាពួកគេគាំទ្ររដ្ឋាភិបាលរបស់លោក Kishida ខណៈមនុស្សច្រើនជាងពាក់កណ្តាលលែងគាំទ្រ។

ការបោះឆ្នោតសកលត្រូវតែធ្វើឡើងនៅត្រីមាសទី៣ នៃឆ្នាំ២០២៥ ដែលផ្តល់ឱ្យប្រធានបក្សថ្មីត្រឹមតែជាងមួយឆ្នាំប៉ុណ្ណោះដើម្បីស្ដារការគាំទ្ររបស់បក្សឡើងវិញ។ លោក រីនតារ៉ូ នីស៊ីមូរ៉ា (Rintaro Nishimura) សហការីនៅក្រុមហ៊ុនប្រឹក្សាយុទ្ធសាស្ត្រ អាស៊ីគ្រុប (The Asia Group) ដែលមានមូលដ្ឋាននៅទីក្រុងវ៉ាស៊ីនតោន បាននិយាយថា «មេដឹកនាំថ្មីត្រូវតែមានកេរ្តិ៍ឈ្មោះស្អាតស្អំ ដែលអាចជាអ្នកនយោបាយវ័យក្មេង ឬមិនមានទំនាក់ទំនងជាមួយលោក Kishida និងមានទស្សនៈកែទម្រង់»៕