បន្ទាយមានជ័យ៖ ការរកឃើញអ្នកវិជ្ជមានជំងឺកូវីដ១៩ ប្រភេទវីរុសបំប្លែងថ្មីដែលតា (Delta) នៅក្នុង​ខេត្តបន្ទាយមានជ័យ រយៈពេលចុងក្រោយនេះ មានការកើនឡើងជាបន្តបន្ទាប់ និងគួរឲ្យ​ព្រួយបារម្ភ ដែលបានបញ្ហានេះ ធ្វើឲ្យគម្រោងបើកសាលាមួយចំនួន ក្នុងខេត្តក៏មានការប៉ះពាល់ផងដែរ ។

ឯកឧត្តម អ៊ុ រាត្រី អភិបាលខេត្តបន្ទាយមានជ័យ នាថ្ងៃទី១០ ខែកញ្ញា ឆ្នាំ២០២១នេះ បានមាន​ប្រសាសន៍ថា កត្តានៃការរកឃើញបន្ថែម នូវអ្នកឆ្លងវីរុសបំប្លែងថ្មីដែលតា អាជ្ញាធរនឹងបើក ឲ្យសិស្ស​ចូលរៀនតែប្រមាណជាង ៦០ភាគរយ នៃផែនការ ចំពោះសាលាដែលបានគ្រោងទុក ហើយសាលា​ទាំងអស់នោះនៅឆ្ងាយៗ មិនមានហានិភ័យ នៃការឆ្លងរាលដាលជំងឺកូវីដ១៩ ប៉ុន្តែសាលាដែលបាន​ផ្អាក គឺរៀនតាមអនឡាញ ។

ឯកឧត្តម បានបន្តថា ចំពោះខេត្តបន្ទាយមានជ័យ គឺមានគម្រោង បើកឲ្យសិស្សចូលរៀនវិញ នៅថ្ងៃច័ន្ទទី១៣ ខែកញ្ញា ឆ្នាំ២០២១ ហើយខេត្តក៏បានដាក់សំណើរនេះ ស្នើសូមទៅឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា រួចរាល់ហើយដែរ ។

នៅក្នុងខេត្តបន្ទាយមានជ័យ មានសាលារៀនសរុបចំនួន ៥១២ទីតាំង ក្នុងនោះមត្តេយ្យសិក្សា​មានចំនួន២១ ។ សាលាបឋមសិក្សាមានចំនួន ៤០៧ទីតាំង ។ សាលាមធ្យមសិក្សាមានចំនួន៨៤សាលា និងសាលាវិទ្យាល័យមួយចំនួន រួមទាំងសាលាឯកជន​ជាច្រើន​កន្លែងទៀត ។ ដោយគម្រោងរបស់ខេត្តនឹងមានការបើកឲ្យសិស្សចូលរៀនធម្មតា តាមបរិបទកូវីដ១៩ ការរៀនតាមបណ្ដុំ និងរៀនតាមអនឡាញ ។

យោងតាមរបាយការណ៍របស់ក្រសួងសុខាភិបាល បានឲ្យដឹងថា គិតត្រឹមថ្ងៃទី៩ ខែកញ្ញា ឆ្នាំ២០២១ ខេត្តបន្ទាយមានជ័យ បានរកឃើញអ្នកវិជ្ជមានកូវីដ១៩ ប្រភេទបំប្លែងថ្មីដែលតា ចំនួន៨២៧ករណី ឈរនៅលេខរៀងទី២ បន្ទាប់រាជធានីភ្នំពេញ ដែលរកឃើញចំនួន ១ ២៥៦ករណី ។

ទន្ទឹមនឹងការបន្តរកឃើញ អ្នកឆ្លងវីរុសបំប្លែងថ្មីដែលតានេះ រដ្ឋបាលខេត្តបន្ទាយមានជ័យ បានបន្ត​អនុវត្ត​បំរាមគោចរនៅពេលយប់ ១សប្ដាហ៍ទៀត ចាប់ពីថ្ងៃទី១០ ដល់ថ្ងៃទី១៦ ខែកញ្ញា ឆ្នាំ២០២១ ដោយអនុវត្តចាប់ពីម៉ោង៩យប់ រហូតដល់ម៉ោង៣ទៀបភ្លឺ លើកលែងតែករណីមួយចំនួន ។ ដោយបុគ្គល ឬនីតិបុគ្គលទាំងឡាយណា ដែលមិនអនុវត្តតាមខ្លឹមសារ សេចក្តីសម្រេច នឹងត្រូវ​ទទួលទោស​ដូចមានកំណត់ក្នុងច្បាប់ ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋាន​គតិយុត្ត​ជាធរមាន ៕

អ​ត្ថបទ ៖ បាន សុខរិទ្ធ