កងកម្លាំងរបស់អ៊ុយក្រែន បានបន្តវាយរុលទៅមុខបន្ថែមទៀតចូលទៅក្នុងតំបន់ ឃើស្ក៍ (Kursk) របស់រុស្ស៊ី កាលពីថ្ងៃពុធ (១៤ សីហា) ខណៈទីក្រុងគីវ បាននិយាយថា ការមានប្រៀបរបស់ខ្លួននឹងបង្កើតបានជាតំបន់ទ្រនាប់ការពារជាយុទ្ធសាស្ត្រដើម្បីការពារតំបន់ព្រំដែនរបស់ខ្លួនពីការវាយប្រហាររបស់រុស្ស៊ី។

ប្រតិបត្តិការរបស់ទីក្រុងគីវ ចូលទៅក្នុងទឹកដីរុស្ស៊ី កាលពីសប្តាហ៍មុនបានធ្វើឱ្យទីក្រុងមូស្គូ មានការភ្ញាក់ផ្អើល និងបន្តទប់ទល់យ៉ាងសស្រាក់សស្រាំ។

ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បាននិយាយថា លោកបានជួបមន្ត្រីជាន់ខ្ពស់ដើម្បីពិភាក្សាអំពីស្ថានភាពមនុស្សធម៌ និងការបង្កើតការិយាល័យបញ្ជាការយោធា «ប្រសិនបើចាំបាច់» នៅក្នុងតំបន់កាន់កាប់ ដែលទីក្រុងគីវ និយាយថាយកបានលើសពី ១.០០០គីឡូម៉ែត្រក្រឡា។

លោក Zelenskiy បានសរសេរនៅលើបណ្ដាញតេលេក្រាមថា «យើងបន្តវាយឆ្ពោះទៅមុខបន្ថែមទៀតនៅក្នុងតំបន់ Kursk» ពីមួយទៅពីរគីឡូម៉ែត្រនៅក្នុងតំបន់ផ្សេងៗគ្នា។ ក្រោយមក នៅក្នុងសុន្ទរកថានៅពេលយប់របស់ខ្លួន លោក Zelenskiy បានលើកឡើងពីការកើនឡើងនៃចំនួនឈ្លើយសឹករុស្ស៊ី ដែលត្រូវបានចាប់ខ្លួននៅតំបន់ Kursk ហើយអាចត្រូវបានដោះដូរជាមួយយុទ្ធជនអ៊ុយក្រែន។

ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានប្តេជ្ញាបណ្តេញកងទ័ពអ៊ុយក្រែនចេញ។ លោកនិយាយថា អ៊ុយក្រែន ដោយមានការគាំទ្រពីលោកខាងលិច មានបំណងផ្តល់ឱ្យទីក្រុងគីវ នូវជំហរដ៏រឹងមាំនៅក្នុងលទ្ធភាពនៃកិច្ចចរចាបទឈប់បាញ់នាពេលអនាគត។ ទោះជាយ៉ាងណាក៏ដោយ រហូតមកដល់ពេលនេះ ការប្រយុទ្ធគ្នាយ៉ាងខ្លាំងក្លាជាងមួយសប្តាហ៍រវាងភាគីទាំងពីរបានបរាជ័យក្នុងការបណ្តេញកងកម្លាំងអ៊ុយក្រែនចេញពីតំបន់ព្រំដែនមួយនេះ៕