ការិយាល័យប្រធានាធិបតីនិយាយថា ប្រធានាធិបតីទួរគី លោក Tayyip Erdogan បាននិយាយទៅកាន់ប្រធានអាជ្ញាធរប៉ាឡេស្ទីន លោក Mahmoud Abbas កាលពីថ្ងៃពុធថា ទួរគីនឹងបន្តគាំទ្របុព្វហេតុប៉ាឡេស្ទីន និងជំរុញសហគមន៍អន្តរជាតិឱ្យបង្កើនសម្ពាធលើអ៊ីស្រាអែល។

ការិយាល័យរបស់លោក Erdogan បាននិយាយនៅក្នុងសារបង្ហោះនៅលើបណ្តាញ X ថា សេចក្តីថ្លែងការណ៍បាននិយាយថា មេដឹកនាំទាំងពីរ បានពិភាក្សាអំពីការវិវឌ្ឍន៍ថ្មីៗ និងជំហានដែលត្រូវអនុវត្តសម្រាប់បទឈប់បាញ់រយៈពេលយូរអង្វែង និងសន្តិភាពនៅតំបន់ហ្កាហ្សា។

លោក Erdogan បានថ្កោលទោសសង្គ្រាមរបស់អ៊ីស្រាអែល នៅតំបន់ហ្កាហ្សា និងបានចោទប្រកាន់ប្រទេសលោកខាងលិចមួយចំនួនថា នៅស្ងៀម និងបន្តគាំទ្រអ៊ីស្រាអែល។

លោក Erdogan បានប្រាប់លោក Abbas ថា ប្រទេសទាំងអស់ ជាពិសេសនៅក្នុងពិភពមូស្លីម គួរតែបង្កើនកិច្ចខិតខំប្រឹងប្រែង ដើម្បីធានាបាននូវបទឈប់បាញ់បន្ទាន់ នៅក្នុងតំបន់ហ្កាហ្សា និងការដឹកជញ្ជូនជំនួយមនុស្សធម៌ដោយពុំមានការរំខានចូលទៅដែនដីប៉ាឡេស្ទីន។

លោក Abbas គ្រោងនឹងថ្លែងសុន្ទរកថា ក្នុងសម័យប្រជុំវិសាមញ្ញនៅសភា ប្រទេសទួរគី នៅថ្ងៃព្រហស្បតិ៍នេះ។

ប្រទេសទួរគី បានរិះគន់ខ្លាំងៗចំពោះសង្គ្រាមនេះ និងបានបញ្ឈប់រាល់ពាណិជ្ជកម្មជាមួយប្រទេសអ៊ីស្រាអែល និងបានដាក់សំណើដើម្បីចូលរួមក្នុងសំណុំរឿងរបស់ប្រទេសអាហ្វ្រិកខាងត្បូង នៅតុលាការយុត្តិធម៌អន្តរជាតិ ដែលចោទប្រកាន់អ៊ីស្រាអែល ពីបទប្រល័យពូជសាសន៍។

លោក Erdogan ដែលធ្លាប់ជាអ្នកគាំទ្រក្រុមហាម៉ាស បាននិយាយថា ប្រទេសទួរគី ក៏ធ្លាប់មានផែនការអញ្ជើញមេដឹកនាំនយោបាយរបស់ក្រុមហាម៉ាស លោក Ismail Haniyeh ដែលត្រូវបានគេធ្វើឃាត នៅទីក្រុងតេអេរ៉ង់។