មនុស្សជាច្រើននៅក្នុងប្រទេសជប៉ុន បានទន្ទឹងរង់ចាំការធ្វើដំណើរនៅចុងសប្តាហ៍នេះ សម្រាប់ថ្ងៃឈប់សម្រាករដូវក្តៅជាប្រពៃណី។ ប៉ុន្តែ អាកាសធាតុកំពុងធ្វើឲ្យផែនការរបស់ពួកគេជួបភាពស្ទាក់ស្ទើរ។

ព្យុះទីហ្វុង Ampil កំពុងវាយបោកបក់នៅលើផ្នែកភាគខាងកើតកោះធំមួយរបស់ប្រទេស រួមទាំងទីក្រុងតូក្យូ ផងដែរ។ ព្យុះ Ampil កំពុងបន្តបង្កើនកម្លាំង ខណៈព្យុះនេះធ្វើដំណើរទៅភាគខាងជើង ជាមួយនឹងកម្លាំងខ្លាំង។

បន្ទាប់ពីវាយបក់ចូលទៅជិតកោះ Izu ព្យុះនេះ ទំនងជានឹងខិតទៅជិតភាគខាងកើតប្រទេសជប៉ុន នៅថ្ងៃសុក្រ រហូតដល់ថ្ងៃសៅរ៍។

ក្រុមហ៊ុនរថភ្លើង នៅប្រទេសជប៉ុនភាគកណ្តាល JR Tokai បាននិយាយថា ក្រុមហ៊ុននឹងលុបចោលសេវាកម្មទាំងអស់សម្រាប់ខ្សែរថភ្លើង Tokaido Shinkansen រវាងទីក្រុងតូក្យូ និងទីក្រុងណាហ្គោយ៉ា ពេញមួយថ្ងៃ នៅថ្ងៃសុក្រ។

ក្រុមហ៊ុនរថភ្លើងជប៉ុន JR East និយាយថា នឹងអាចមានការផ្អាកសេវាកម្ម និងការពន្យារពេលសំខាន់ៗ នៅថ្ងៃសុក្រ ចាប់ពីម៉ោងអំឡុងពេលថ្ងៃត្រង់ និងពេលល្ងាច សម្រាប់ខ្សែរថភ្លើង ភាគច្រើន។

សម្រាប់ការធ្វើដំណើរតាមផ្លូវអាកាស ក្រុមហ៊ុនអាកាសចរណ៍ All Nippon Airways និង Japan Airlines បាននិយាយថា ក្រុមហ៊ុននឹងលុបចោលជើងហោះហើរសរុបប្រហែល ៥០០ជើង នៅថ្ងៃសុក្រ ដែលបម្រើដល់អាកាសយានដ្ឋាន Haneda និងអាកាសយានដ្ឋាន Narita។