'ប្រធានាធិបតីសហរដ្ឋអាមេរិក លោក Joe Biden បានកោតសរសើរនាយករដ្ឋមន្ត្រីជប៉ុន លោក Kishida Fumio ដែលនឹងលាចេញពីតំណែង ចំពោះអ្វីដែលលោកហៅថា «ភាពជាអ្នកដឹកនាំដ៏មានប្រសិទ្ធភាព» ដោយបាននិយាយថា លោក Kishida បានផ្លាស់ប្តូរតួនាទីរបស់ប្រទេសជប៉ុន នៅក្នុងពិភពលោក។

លោក Biden បានចេញសេចក្តីថ្លែងការណ៍មួយ កាលពីថ្ងៃពុធ បន្ទាប់ពីលោក Kishida បានប្រកាសពីការសម្រេចចិត្តរបស់លោកក្នុងការមិនឈរឈ្មោះប្រកួតប្រជែងថ្នាក់ដឹកនាំរបស់គណបក្សប្រជាធិបតេយ្យសេរីនិយម ដែលកំពុងកាន់អំណាច នៅខែក្រោយនេះ។ នោះមានន័យថា លោក Kishida នឹងលាចេញពីតំណែងជានាយករដ្ឋមន្ត្រី។

លោក Biden បាននិយាយថា លោក និងនាយករដ្ឋមន្ត្រីជប៉ុន បានធ្វើការរួមគ្នាដើម្បីនាំយកសម្ព័ន្ធភាព អាមេរិក និងជប៉ុន «ឡើងដល់កម្រិតខ្ពស់ថ្មី»។ លោកប្រធានាធិបតី និយាយថា លោក Kishida បានបង្ហាញ «យុទ្ធសាស្ត្រសន្តិសុខជាតិថ្មីមួយដ៏សំខាន់» និងបានគាំទ្រយ៉ាងខ្លាំងចំពោះអ៊ុយក្រែន បន្ទាប់ពីការវាលុករបស់រុស្ស៊ី។

លោក Biden និយាយថា លោក Kishida រួមជាមួយប្រធានាធិបតីប្រទេសកូរ៉េខាងត្បូង លោក Yoon Suk-yeol មានចំណាត់ការជាប្រវត្តិសាស្ត្រ ដើម្បីឈានទៅរកយុគសម័យថ្មីនៃកិច្ចសហប្រតិបត្តិការត្រីភាគីរបស់សហរដ្ឋអាមេរិក កូរ៉េខាងត្បូង និងប្រទេសជប៉ុន។

លោក Biden បានបញ្ចប់សេចក្តីថ្លែងការណ៍របស់លោកដោយនិយាយថា អរគុណដល់ការដឹកនាំរបស់នាយករដ្ឋមន្ត្រីជប៉ុន អនាគតនៃសម្ព័ន្ធភាពអាមេរិកនិងជប៉ុនកាន់តែរឹងមាំ និងត្រចះត្រចង់ជាងពេលណាៗទាំងអស់។