ក្រសួងការបរទេសនៃប្រទេសហ្ស៊កដានី កាលពីថ្ងៃពុធ បានថ្កោលទោសចំពោះផែនការរបស់អ៊ីស្រាអែលក្នុងការកសាងការតាំងទីលំនៅថ្មី នៅលើតំបន់បេតិកភណ្ឌពិភពលោករបស់អង្គការយូណេស្កូ នៅជិតទីក្រុង Bethlehem នៃតំបន់វេសបែង។

លោក Sufian Qudah អ្នកនាំពាក្យក្រសួងការបរទេស បាននិយាយនៅក្នុងសេចក្តីថ្លែងការណ៍មួយថា ការសម្រេចនេះ បង្កបញ្ហាប្រឈមយ៉ាងធ្ងន់ធ្ងរ និងជាការរំលោភយ៉ាងធ្ងន់ធ្ងរលើច្បាប់អន្តរជាតិ និងដំណោះស្រាយរបស់អន្តរជាតិ ជាពិសេសសេចក្តីសម្រេចលេខ ២៣៣៤របស់ក្រុមប្រឹក្សាសន្តិសុខអង្គការសហប្រជាជាតិ និងអនុសញ្ញាពាក់ព័ន្ធសម្រាប់ការការពារសម្បត្តិវប្បធម៌ និងបេតិកភណ្ឌ។

លោក Qudah បាននិយាយថា សកម្មភាពជាប្រព័ន្ធរបស់អ៊ីស្រាអែលលើការកសាងអង្គភាពតាំងទីលំនៅថ្មី ពង្រឹងការកាន់កាប់នៅតំបន់វេសបែង និងធ្វើឲ្យប៉ះពាល់ដល់ឱកាសទាំងអស់ ដើម្បីសម្រេចបានសន្តិភាព ដោយផ្អែកលើដំណោះស្រាយរដ្ឋពីរ។

លោកបាននិយាយថា អ៊ីស្រាអែល ចាំបាច់ត្រូវទទួលត្រូវ ក្រោមច្បាប់អន្តរជាតិ និងបញ្ឈប់ផែនការតាំងទីលំនៅរបស់ខ្លួន ដែលមានគោលបំណងដណ្តើមយកទឹកដី និងទ្រព្យសម្បត្តិរបស់ប៉ាឡេស្ទីន និងជម្លៀសប្រជាជនរបស់ពួកគេ ដោយបានអំពាវនាវជាថ្មីឱ្យសហគមន៍អន្តរជាតិ ចាត់វិធានការជាបន្ទាន់ និងប្រកបដោយប្រសិទ្ធភាព ដើម្បីបញ្ឈប់សកម្មភាពរបស់អ៊ីស្រាអែល។