លោក Dmitry Polyansky អនុប្រធានតំណាងអចិន្ត្រៃយ៍ទី១របស់រុស្ស៊ីប្រចាំអង្គការសហប្រជាជាតិ បានប្រាប់អ្នកសារព័ត៌មានថា ការប្រើប្រាស់អាវុធរបស់សហរដ្ឋអាមេរិកដោយអ៊ុយក្រែនក្នុងការវាយប្រហារឆ្លងព្រំដែនរបស់ខ្លួនលើតំបន់ Kursk នឹងធ្វើឲ្យស្ថានការណ៍កាន់តែតានតឹងឡើង។

អ្នកការទូតរូបនេះ បាននិយាយថា៖«ការប្រើប្រាស់អាវុធរបស់អាមេរិកនៅតំបន់ Kursk នៅអ៊ុយក្រែន ឬកន្លែងផ្សេងទៀតសម្រាប់ពួកយើង គឺជាទង្វើនៃការធ្វើឲ្យភាពតានតឹងកាន់តែកើនឡើង ហើយវានឹងមានផលវិបាកយ៉ាងធ្ងន់ធ្ងរ។ យើងកំពុងនិយាយយ៉ាងច្បាស់អំពីរឿងនេះ ជាមួយសហសេវិកអាមេរិករបស់យើង»។

មុននេះ សារព័ត៌មាន Bloomberg បាននិយាយដោយសំដៅលើប្រភពរបស់ខ្លួនថា សហរដ្ឋអាមេរិក និងសហភាពអឺរ៉ុប បានផ្តល់ «ការគាំទ្រ» ដល់អ៊ុយក្រែន ដើម្បីវាយប្រហារលើទឹកដីរុស្ស៊ី។

ការវាយប្រហារឆ្លងព្រំដែនដ៏ធំ នៅលើតំបន់ Kursk បានចាប់ផ្តើម កាលពីថ្ងៃទី ៦ ខែសីហា។ ការព្រមានអំពីការវាយប្រហារដោយមីស៊ីល ត្រូវបានចេញម្តងហើយម្តងទៀត នៅក្នុងតំបន់ព្រំដែននេះ។ យោងតាមរបាយការណ៍ដែលបានធ្វើបច្ចុប្បន្នភាព ជនស៊ីវិល ១២នាក់ បានស្លាប់ និង មនុស្ស ១២១នាក់ បានរងរបួស ក្នុងនោះមានកុមារ ១០នាក់។ មនុស្សចំនួន ៦៩នាក់ បានរងរបួសដោយសារការបាញ់ផ្លោង នៅតំបន់ Kursk កំពុងស្ថិតនៅក្នុងមន្ទីរពេទ្យ ដោយក្នុងនោះ ១៧នាក់ ស្ថិតក្នុងស្ថានភាពធ្ងន់ធ្ងរ។ មនុស្សជាង ១២.០០០នាក់ បានចាកចេញ ឬត្រូវបានជម្លៀសចេញពីតំបន់ព្រំដែន ចំពេលមានការវាយប្រហារដោយទាហានអ៊ុយក្រែន។