ក្រសួងការបរទេសអេហ្ស៊ីប បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា រដ្ឋមន្ត្រីការបរទេសអេហ្ស៊ីប លោក Badr Abdelatty បានពិភាក្សាតាមទូរស័ព្ទជាមួយសមភាគីរបស់លោក នៅក្នុងប្រទេសអារ៉ាប់រួម (UAE) អារ៉ាប៊ីសាអ៊ូឌីត និងទួរគី ដើម្បីពិភាក្សាអំពីកិច្ចខិតខំប្រឹងប្រែងរួមគ្នា ដើម្បីទប់ស្កាត់ភាពតានតឹងក្នុងតំបន់ រួមទាំងវិបត្តិស៊ូដង់ និងសង្គ្រាមនៅតំបន់ហ្កាហ្សាស្ទ្រីប។ 

កិច្ចពិភាក្សាដាច់ដោយឡែករបស់លោក Abdelatty ជាមួយរដ្ឋមន្ត្រីការបរទេសអារ៉ាប់រួម លោក Sheikh Abdullah bin Zayed Al Nahyan រដ្ឋមន្ត្រីការបរទេសអារ៉ាប៊ីសាអ៊ូឌីត លោក Faisal bin Farhan Al Saud និងរដ្ឋមន្ត្រីការបរទេសទួរគី លោក Hakan Fidan បានផ្តោតលើ «វិធីសម្របសម្រួល និងបង្កើនកិច្ចខិតខំប្រឹងប្រែង ដើម្បីទប់ស្កាត់ភាពតានតឹង ក្នុងតំបន់បច្ចុប្បន្ន និងធ្វើឲ្យស្ថានភាពស្ថិតក្នុងការគ្រប់គ្រងបាន»។

ក្រសួងការបរទេសអេហ្ស៊ីប បាននិយាយថា កិច្ចពិភាក្សាដែលបានធ្វើឡើងកាលពីថ្ងៃអង្គារ ក៏បានផ្តោតទៅលើកិច្ចខិតខំប្រឹងប្រែងសម្រុះសម្រួលក្នុងតំបន់ និងអន្តរជាតិដែលកំពុងបន្ត ដើម្បីឈានដល់បទឈប់បាញ់ នៅក្នុងប្រទេសស៊ូដង់រវាងកងទ័ពស៊ូដង់ និងកងកម្លាំងយោធាប៉ារ៉ា គាំទ្ររហ័ស និងបទឈប់បាញ់មួយទៀតនៅតំបន់ហ្កាហ្សារវាងអ៊ីស្រាអែល និងក្រុមហាម៉ាស ក៏ដូចជាការវិវឌ្ឍនៅក្នុងតំបន់ញកអាហ្វ្រិកផងដែរ។ 

ការពិភាក្សានេះ បានកើតឡើង ស្របពេលមានភាពតានតឹងកាន់តែខ្លាំងឡើងរវាងអ៊ីស្រាអែល និងលីបង់ ចាប់តាំងពីការសម្លាប់មេបញ្ជាការយោធាជាន់ខ្ពស់របស់ក្រុមហេសបូឡា លោក Fouad Shokor និងជនស៊ីវិល ៧នាក់ នៅក្នុងការវាយឆ្មក់របស់អ៊ីស្រាអែល ដែលបានកំណត់គោលដៅលើអគារមួយ នៅភាគខាងត្បូងទីក្រុងបេរូត កាលពីថ្ងៃទី ៣០ន ខែកក្កដា បន្ទាប់ពីមេដឹកនាំហេសបូឡា លោក Hassan Nasrallah បានប្តេជ្ញាឆ្លើយតបយ៉ាងជាក់លាក់និងគួរឲ្យឈឺចាប់បំផុត។