សហរដ្ឋអាមេរិក កាលពីថ្ងៃពុធ បានបញ្ចុះបញ្ចូលដល់កងទ័ពស៊ូដង់ ឱ្យចូលរួមក្នុងកិច្ចចរចាស្តីពីការបញ្ចប់សង្រ្គាមដ៏បង្ហូរឈាម ខណៈកិច្ចពិភាក្សាបានបើកក្នុងប្រទេសស្វីស ដោយមានតែការចូលរួមពីភាគីប្រជែងរបស់ខ្លួនតែប៉ុណ្ណោះ។ សង្រ្គាម បានផ្ទុះឡើងតាំងពីខែមេសា ឆ្នាំ២០២៣ រវាងកងទ័ពស៊ូដង់ ក្រោមការគ្រប់គ្រងរបស់លោក Abdel Fattah al-Burhan និងកងកម្លាំងគាំទ្ររហ័សយោធាប៉ារ៉ា (RSF) ដឹកនាំដោយអតីតអនុប្រធានរបស់លោក គឺលោក Mohamed Hamdan Daglo ។

ដោយលោក Burhan ពុំបានបង្ហាញខ្លួនសម្រាប់ការចាប់ផ្តើមកិច្ចចរចា រដ្ឋមន្ត្រីការបរទេសសហរដ្ឋអាមេរិក លោក Antony Blinken បានអំពាវនាវដោយផ្ទាល់ទៅលោក តាមទូរស័ព្ទដើម្បីឲ្យចូលរួម។ អ្នកនាំពាក្យក្រសួងការបរទេសលោក Vedant Patel បាននិយាយថា លោក Blinken បាននិយាយឡើងវិញពីតម្រូវការសម្រាប់ការចូលរួម នៅក្នុងការសន្ទនារបស់លោកជាមួយ លោក Burhan ។

លោក Patel និយាយថា លោក Blinken បានប្រាប់លោក Burhan ពី «តម្រូវការបន្ទាន់» សម្រាប់ភាគីទាំងពីរ ដើម្បីបញ្ចប់សង្រ្គាម និងធានាបានដំណើរការចូលនៃជំនួយមនុស្សធម៌សម្រាប់ប្រជាជនស៊ូដង់រាប់លាននាក់ ដែលកំពុងរងគ្រោះ។ លោក Tom Perriello បេសកជនពិសេសរបស់សហរដ្ឋអាមេរិកប្រចាំប្រទេសស៊ូដង់ បាននិយាយបន្ទាប់ពីបើកសម័យប្រជុំថា វាជាពេលវេលាដ៏ប្រសើរសម្រាប់សំឡេងគ្រាប់កាំភ្លើងដែលត្រូវស្ងាត់ស្ងៀម។

កិច្ចពិភាក្សា ដែលអាចមានរយៈពេលរហូតដល់ទៅ ១០ ថ្ងៃ កំពុងត្រូវបានធ្វើឡើងដោយបិទទ្វារ ក្នុងទីតាំងពុំបានបង្ហាញនៅក្នុងប្រទេសស្វីស។ ខណៈគណៈប្រតិភូកងកម្លាំងគាំទ្ររហ័ស(RSF) កំពុងចូលរួម កងកម្លាំងប្រដាប់អាវុធស៊ូដង់ (SAF) មិនសប្បាយចិត្តចំពោះរបៀបដែលរៀបចំដោយទីក្រុងវ៉ាស៊ីនតោននោះទេ។

រដ្ឋមន្ត្រីប្រព័ន្ធផ្សព្វផ្សាយប្រទេសស៊ូដង់ លោក Graham Abdelkader បាននិយាយនៅមុនកិច្ចពិភាក្សាថា រដ្ឋាភិបាល ច្រានចោល «អ្នកសង្កេតការណ៍ ឬអ្នកចូលរួមថ្មីណាមួយ» បន្ទាប់ពីទីក្រុងវ៉ាស៊ីនតោន បានទទូចឲ្យមានការចូលរួមរបស់ប្រទេសអារ៉ាប់រួម ជាអ្នកសង្កេតការណ៍។

កងទ័ពស៊ូដង់ បានចោទប្រកាន់ប្រទេសអារ៉ាប់រួមម្តងហើយម្តងទៀតថា បានគាំទ្រកងកម្លាំងគាំទ្ររហ័ស ដែលការចោទប្រកាន់នេះប្រទេសអារ៉ាប់រួមបាន បដិសេធ។