ខណៈដែលពិភពលោកកំពុងរង់ចាំជំហានបន្ទាប់របស់អ៊ីរ៉ង់ នៅក្រៅប្រទេស ការពិភាក្សានៅក្នុងសាធារណរដ្ឋអ៊ិស្លាមមួយនេះ មិនមែនគ្រាន់តែជាអ្វី ដែលការវាយប្រហារសងសឹកជាមួយអ៊ីស្រាអែល នឹងមានអត្ថន័យសម្រាប់មជ្ឈិមបូព៌ាប៉ុណ្ណោះទេ ប៉ុន្តែវាថែមទាំងមានអត្ថន័យ សម្រាប់សេដ្ឋកិច្ច និងសេរីភាពរបស់ប្រទេសនេះផងដែរ។

នៅពេលដែលភាពតានតឹង រវាងអ៊ីរ៉ង់ និងអ៊ីស្រាអែល ឡើងកម្ដៅខ្លាំងឡើងៗ ការពិភាក្សាផ្ទៃក្នុងក្នុងរបស់អ៊ីរ៉ង់ ផ្តោតលើផលវិបាកដែលអាចកើតមានពីការវាយប្រហារសងសឹកនេះ។ រដ្ឋាភិបាលអ៊ីរ៉ង់ ដែលដឹកនាំដោយប្រធានាធិបតីជាប់ឆ្នោតថ្មី លោក Masoud Pezeshkian ប្រឈមនឹងសម្ពាធ ក្នុងការឆ្លើយតបទៅនឹងការធ្វើឃាតលើមេដឹកនាំក្រុមហាម៉ាស លោក Ismail Haniyeh នាពេលថ្មីៗនេះ នៅក្នុងទីក្រុងតេអេរ៉ង់ ដែលគេជឿថា ជាស្នាដៃរបស់អ៊ីស្រាអែល។ តែអ៊ីស្រាអែលមិនបានធ្វើអត្ថាធិប្បាយអ្វីលើបញ្ហានេះឡើយ។

ហើយស្របពេលដែលមន្ត្រីអ៊ីរ៉ង់អះអាងនូវសិទ្ធិសងសឹករបស់ខ្លួន ក្តីបារម្ភលើការធ្លាក់ចុះសេដ្ឋកិច្ច និងនយោបាយបានរីកធំឡើង ដ្បិតប្រទេសនេះមានភាពផុយស្រួយរួចទៅហើយ ដោយសារការដាក់ទណ្ឌកម្ម និងភាពចលាចលផ្ទៃក្នុង។

ប្រជាជនអ៊ីរ៉ង់មួយចំនួន ដូចជាអ្នកជំនាញផ្នែកព័ត៌មានវិទ្យាម្នាក់ឈ្មោះ Omid បារម្ភថា ការសងសឹកហួសហេតុ អាចជួបនឹងផលវិបាកធ្ងន់ធ្ងរ ខណៈអ្នកផ្សេងទៀត បានលើកឡើងថា អ៊ីរ៉ង់អាចឆ្លើយតបតាមវិធីជាក់លាក់ ឬសម្ងាត់ជាងនេះ។ យ៉ាងណាក្ដី ភាពមិនស្រណុកចិត្ត កំពុងវិលវល់ក្នុងចំណោមសាធារណជនទូទៅអំពីលទ្ធភាពនៃជម្លោះកាន់តែរីករាលដាលធំឡើងៗ ដោយអ្នកស្រុកមួយចំនួនបានគាំទ្រឲ្យមានវិធីសាស្រ្តប្រុងប្រយ័ត្នបន្ថែមទៀត ដើម្បីជៀសវាងកុំឲ្យភាពតានតឹងមានខ្លាំងឡើងៗ។

ទន្ទឹមនឹងនោះ កិច្ចខិតខំប្រឹងប្រែងការទូតពីបណ្ដាប្រទេសធំៗ នៅតែបន្តមាន ដោយប្រធានាធិបតីអាមេរិក លោក Joe Biden លើកឡើងថា អ៊ីរ៉ង់អាចនឹងបោះបង់ចោលការសងសឹក ប្រសិនបើឈានដល់បទឈប់បាញ់ នៅតំបន់ហ្កាហ្សា។ តែទោះជាយ៉ាងនេះក្តី បណ្ដាអ្នកដឹកនាំរបស់អ៊ីរ៉ង់ នៅតែប្រកាន់ជំហររបស់ខ្លួន ដោយច្រានចោលការអំពាវនាវរបស់លោកខាងលិច ដែលចង់ឲ្យបន្ធូរបន្ថយភាពតានតឹងនោះ៕