នាយិកាសាកលវិទ្យាល័យ Columbia នៅសហរដ្ឋអាមេរិក លោកស្រី Minouche Shafik បាននិយាយថា លោកស្រីបានលាលែងពីតំណែងហើយ កាលពីថ្ងៃពុធ (ទី១៤ ខែសីហា) ដោយការលាឈប់ពីតួនាទី កើតមានឡើងក្រោយរយៈពេលជិត ៤ខែ បន្ទាប់ពីលោកស្រីបានដោះស្រាយជាមួយការតវ៉ារបស់សាកលវិទ្យាល័យ ជុំវិញសង្គ្រាមរបស់អ៊ីស្រាអែល នៅតំបន់ហ្កាហ្សា។

លោកស្រីបណ្ឌិត Shafik ដែលជាអ្នកជំនាញសេដ្ឋកិច្ចកើតនៅប្រទេសអេហ្ស៊ីប និងជាអតីតនាយិកាសាលាសេដ្ឋកិច្ចទីក្រុងឡុងដ្រ៍ នៅប្រទេសអង់គ្លេស បានប្រាប់ថា លោកស្រីសម្រេចចិត្តចុះចេញពីតំណែងចាប់ពីថ្ងៃទី១៤ ខែសីហា បន្ទាប់ពីបានចាប់ផ្តើមការងារ នៅខែកក្កដា ឆ្នាំ២០២៣។

ការលាលែងពីតំណែងរបស់លោកស្រីបណ្ឌិត Shafik គឺជារឿងមិននឹកស្មានដល់ បើតាមពេលវេលា ដោយថ្ងៃដំបូងនៃឆមាសរដូវស្លឹកឈើជ្រុះនៅមិនដល់ ៣សប្តាហ៍ទៀតទេ។ សមាជិកក្រុមប្រឹក្សាភិបាលរបស់សាកលវិទ្យាល័យ Columbia បាននិយាយម្តងហើយម្តងទៀតថា ពួកគេគាំទ្រដល់ការដឹកនាំរបស់លោកស្រី ហើយបរិវេណសាលាបានស្ងប់ស្ងាត់យ៉ាងខ្លាំងពេញមួយរដូវក្តៅ។

ប៉ុន្តែការគ្រប់គ្រងរយៈពេលខ្លីរបស់លោកស្រី គូសបញ្ជាក់ថា តើដែលបាតុកម្មគាំទ្រប៉ាឡេស្ទីន បានអង្រួនបរិវេណសាលា និងសាកលវិទ្យាល័យនានានៅទូទាំងប្រទេសយ៉ាងដូចម្ដេច។ លោកស្រី គឺជាប្រធាន Ivy League (ក្រុមនៃមហាវិទ្យាល័យ និងសាកលវិទ្យាល័យឯកជនចំនួន៨ នៅភាគឦសានសហរដ្ឋអាមេរិក) ទី៣ ដែលបានលាលែងពីតំណែង កាលពីឆ្នាំមុន៕