មន្ត្រីក្រសួងការបរទេសកូរ៉េខាងត្បូង បាននិយាយនៅថ្ងៃព្រហស្បតិ៍នេះថា កូរ៉េខាងត្បូង និងសហរដ្ឋអាមេរិក បានបញ្ចប់ការចរចាមួយផ្សេងទៀតក្នុងសប្តាហ៍នេះ ស្តីពីការកំណត់ចំណែកនៃការចំណាយរបស់ទីក្រុងសេអ៊ូល សម្រាប់ការឈរជើងរបស់កងកម្លាំងសហរដ្ឋអាមេរិកនៅកូរ៉េ (USFK)។

យោងតាមមន្ត្រី បានឲ្យដឹងថា ជុំទី៦នៃការចរចាស្តីពីកិច្ចព្រមព្រៀងវិធានការពិសេស (SMA) បានធ្វើឡើងពីថ្ងៃចន្ទដល់ថ្ងៃពុធ នៅក្នុងទីក្រុងវ៉ាស៊ីនតោន។ កិច្ចព្រមព្រៀង SMA រយៈពេល ៦ឆ្នាំ បច្ចុប្បន្ន នឹងផុតកំណត់ នៅចុងឆ្នាំក្រោយ។

មន្ត្រីរូបនេះ បាននិយាយថា៖«ប្រទេសកូរ៉េខាងត្បូង និងសហរដ្ឋអាមេរិក បានធ្វើការពិគ្រោះយោបល់ដោយផ្តោតសំខាន់សម្រាប់វឌ្ឍនភាពសំខាន់ៗនៅក្នុងវិស័យចម្បងៗ ដែលភាគីទាំងពីរចាប់អារម្មណ៍»។

ចាប់តាំងពីឆ្នាំ ១៩៩១ មក ទីក្រុងសេអ៊ូល បានចែករំលែកការចំណាយមួយផ្នែកសម្រាប់កងកម្លាំង USFK ទៅលើការសាងសង់មូលដ្ឋានយោធា ដូចជាបន្ទាយ ក៏ដូចជាកន្លែងបណ្តុះបណ្តាល ការអប់រំ ប្រតិបត្តិការ និងទំនាក់ទំនង និងការគាំទ្រផ្នែកភ័ស្តុភារផ្សេងទៀត។