ភ្នំពេញ៖ នៅក្នុងសន្និសីទអន្តរជាតិ លើកទី១ ស្តីពីទេសចរណ៍ម្ហូបអាហារកម្ពុជា នៅថ្ងៃទី២១ ខែសីហានេះ តំណាងអង្គការទេសចរណ៍ពិភពលោក UNWTOនិងអង្គការUNESCO នៃអង្គការសហប្រជាជាតិ បានគាំទ្រកម្ពុជាចំពោះការស្នើសុំម្ហូបអាហារប្រពៃណីខ្មែរ ចំនួន១០មុខ ត្រៀមដាក់បញ្ចូលក្នុងបញ្ជីសម្បត្តិបេតិកភណ្ឌអរូបីពិភពលោក។
បើតាមការអោយដឹងពីឯកឧត្តម ថោង រដ្ឋសក្កិ អគ្គនាយក អគ្គនាយកដ្ឋានអភិវឌ្ឍទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍ បានថ្លែងថា តាមរយៈសន្និសីទអន្តរជាតិស្តីពីទេសចរណ៍ម្ហូបអាហារកម្ពុជានៅពេលនេះ ក្រសួងនឹងស្នើសុំគោលការណ៍រាជរដ្ឋាភិបាល ដើម្បីរៀបចំឯកសារមុខម្ហូបខ្មែរជាសម្លរចំនួន៥ និងមុខម្លូបជាបង្អែមប្រពៃណីចំនួន៥ទៀត ត្រៀមដាក់បញ្ចូលបញ្ជីបញ្ចូលក្នុងបញ្ជីសម្បត្តិបេតិកភណ្ឌអរូបីយពិភពលោក។
ឯកឧត្ដម បន្តថា មកដល់ពេលនេះ ក្រសួងទេសចរណ៍ បានសហការជាមួយក្រសួងវប្បធម៌ និងវិចិត្រសិល្បៈ រៀបចំឯកសារមុខម្ហូបអាហារខ្មែរទាំងនេះ បានមួយចំនួនរួចហើយ ក្រសួងនឹងបន្តពិភាក្សារៀបចំផ្នែកបច្ចេកទេសជាមួយ អង្គការUNESCO ដើម្បីត្រៀមដាក់បញ្ចូលបញ្ជីបញ្ចូលក្នុងបញ្ជីសម្បត្តិបេតិកភណ្ឌអរូបីយពិភពលោក។
នៅពេលនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានស្នើមន្ត្រី និងភាគីពាក់ព័ន្ធ ត្រូវរួមគ្នាកែច្នៃ ចងក្រងខ្លឹមសារ បកស្រាយបង្ហាញអំពីម្ហូបអាហារ ដែលជាសម្បត្តិវប្បធម៌ បេតិកភណ្ឌទាំងនេះ ដើម្បីចូលរួមលើកកម្ពស់ជីវភាពរស់នៅ របស់ប្រជាពលរដ្ឋក្នុងតំបន់នោះ តាមរយៈការមកដល់នៃទេសចរជាតិ-អន្តរជាតិ និងត្រៀមដាក់បញ្ចូលក្នុងបញ្ជីបេតិកភណ្ឌផងដែរ។
បើតាមលោក Xu Jing នាយកប្រចាំតំបន់អាស៊ី-ប៉ាស៊ីហ្វិក នៃអង្គការទេសចរណ៍ពិភពលោក (UNWTO) បានថ្លែងថា ការអភិរក្សម្ហូបអាហារ គឺវាផ្សារភ្ជាប់នឹងការងារកសិកម្ម នៅក្នុងតំបន់មួយ ហើយវាក៏ជាអត្តសញ្ញាណទ្រព្យសម្បត្តិបេតិកភណ្ឌ របស់ប្រទេសមួយ ដែលគេកំពុងផ្តោតការយកចិត្តដាក់ខ្ពស់ និងត្រូវរៀបចំដាក់បញ្ចូលក្នុងបញ្ជីបេតិកភ័ណ្ឌពិភពលោក ដើម្បីបង្ហាញអោយប្រជាពលរដ្ឋនៅពិភពលោក មានការយល់ដឹង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
