ស្រ្តី បុរស និងក្មេងៗ បានប្រជ្រៀតគ្នានៅផ្ទះបាយសប្បុរសធម៌នៅទីក្រុង Beit Lahia តំបន់ហ្កាហ្សា ដោយពួកគេកាន់ចានបាយ ពេលដែលពួកគេពិបាកស្វែងរកស្បៀងអាហារគ្រប់គ្រាន់ ដើម្បីចិញ្ចិមគ្រួសាររបស់ពួកគេ ។

លោក Diab Mkheirezគឺជាបុរសប៉ាឡេស្ទីនមួយរូប និយាយថា ខ្ញុំមកទីនេះជាមួយក្មេងតូចៗរបស់ពួកយើងមាននៅផ្ទះ ។

លោកថា ខ្ញុំមានគ្នាជាង ៣០នាក់នៅផ្ទះ ។ អាហារដែលខ្ញុំរកបាន មិនគ្រប់គ្រាន់សម្រាប់មនុស្សនៅផ្ទះនោះឡើយ ។ ខ្ញុំរង់ចាំអស់រយៈពេល ៥-៦ម៉ោង ដើម្បីយកអាហារល្មមសម្រាប់មនុស្ស ៥-៦នាក់នៅក្នុងគ្រួសាររបស់ខ្ញុំ ។

លោកបន្តទៀតថា ខ្ញុំបង្ខំចិត្តធ្វើបែបនេះ ពីព្រោះថាខ្ញុំគ្មានប្រាក់ចំណូល ឬអ្វីនោះទេ ។ វាមានរយៈពេល ១០ខែមកហើយ ចាប់តាំងពីសង្រ្គាមផ្ទុះឡើង ពួកយើងស្ថិតក្រោមការឡោមព័ទ្ធ និងការសម្លាប់ ហើយសូម្បីតែឱសថក៏គ្មានដែរសម្រាប់ព្យាបាលកូនៗរបស់ខ្ញុំ ។ 

ពលរដ្ឋហ្កាហ្សានៅតំបន់ភាគខាងជើងដែនដីបិទច្រកមួយនេះ បានជួបការលំបាកអស់រយៈពេលជាច្រើនខែមកហើយ ដោយសារជួបវិបត្តិអត់ឃ្លានធ្ងន់ធ្ងរ ចាប់តាំងពីសង្រ្គាមផ្ទុះឡើងរវាងអ៊ីស្រាអែល និងក្រុមហាម៉ាស់កាលពីថ្ងៃទី ៧ ខែតុលា ។

អេហ្ស៊ីប សហរដ្ឋអាមេរិក និងកាតា បានកំណត់ជុំថ្មីនៃកិច្ចចរចាបទឈប់បាញ់នៅថ្ងៃព្រហស្បតិ៍នេះ ៕