តុលាការរុស្ស៊ី បានកាត់ទោសស្ត្រីជនជាតិអាមេរិកដើមកំណើតរុស្ស៊ីម្នាក់ឲ្យជាប់ពន្ធនាគាររយៈពេល ១២ឆ្នាំពីបទក្បត់ជាតិ បន្ទាប់ពីរូបនាងបានបរិច្ចាគប្រាក់ត្រឹមតែជាង ៥០ដុល្លារដល់អង្គការសប្បុរសធម៌គាំទ្រអ៊ុយក្រែនដែលមានមូលដ្ឋាន នៅសហរដ្ឋអាមេរិក។

នាង Ksenia Karelina វ័យ ៣៣ឆ្នាំ បានផ្ដល់ចម្លើយពីភាពមានទោស ចំពោះការចោទប្រកាន់នេះ។ រូបនាងត្រូវបានឃុំខ្លួន នៅទីក្រុង Yekaterinburg របស់ប្រទេសរុស្ស៊ី កាលពីដើមឆ្នាំនេះ ខណៈពេលដែលទៅសួរសុខទុក្ខជីដូនជីតារបស់នាង។

សាលក្រមនេះត្រូវបានប្រកាស នៅថ្ងៃព្រហស្បតិ៍ (ទី១៥ ខែសីហា) នេះ បន្ទាប់ពីមាននូវការកាត់ក្តីដោយបិទទ្វារ ក្នុងតុលាការ នៅតំបន់ Sverdlovsk ដែលដំណើការនោះបានបញ្ចប់ កាលពីសប្តាហ៍មុន។ សារព័ត៌មាន RIA Novosti បានរាយការណ៍ថា ក្រុមអ្នកស៊ើបអង្កេត បាននិយាយថា នាង Karelina បានផ្ញើប្រាក់ ដើម្បីទិញគ្រឿងយុទ្ធោបករណ៍ និងគ្រាប់រំសេវ សម្រាប់កងទ័ពអ៊ុយក្រែន។ មេធាវីរបស់ជនជាប់ទោសរូបនេះ គឺលោក Mikhail Mushailov បានប្រាប់ប្រព័ន្ធផ្សព្វផ្សាយរុស្ស៊ីថា លោកនឹងប្តឹងឧទ្ធរណ៍ ចំពោះសាលក្រមនេះ។

គួរបញ្ជាក់ថា ការផ្តន្ទាទោសលើរូបនាងនេះកើតឡើងក្នុងរយៈពេល ២សប្តាហ៍ បន្ទាប់ពីប្រទេសរុស្ស៊ី និងលោកខាងលិច បានអនុវត្តការដោះដូរអ្នកទោសដ៏ធំបំផុតមិនធ្លាប់មាន គិតចាប់តាំងពីសម័យសង្គ្រាមត្រជាក់ ដែលមនុស្ស ២៤នាក់ ក្នុងនោះរួមទាំងអតីតទាហានម៉ារីនអាមេរិក លោក Paul Whelan និងអ្នកសារព័ត៌មាន Evan Gershkovich របស់សារព័ត៌មាន Wall Street Journal ផងដែរ ត្រូវបានដោះលែង ជាផ្នែកនៃកិច្ចព្រមព្រៀងដ៏ទូលំទូលាយមួយ ដែលពាក់ព័ន្ធនឹងយ៉ាងហោចណាស់ប្រទេសចំនួន៧៕