ជើងហោះហើរជាច្រើនវ៉ុល និងសេវាកម្មរថភ្លើងជាច្រើនខ្សែ ត្រូវបានបញ្ឈប់នៅថ្ងៃព្រហស្បតិ៍នេះ ពេលដែលទីក្រុងតូក្យូ ប្រទេសជប៉ុន ប្រឈមការមកដល់របស់ព្យុះទីហ្វុង Ampil អំឡុងរដូវវិស្សមកាលដ៏មមាញឹកខ្លាំងនេះ ។

ព្យុះទីហ្វុង Ampil ដែលទីភ្នាក់ងារឧតុនិយមជប៉ុនចាត់ទុកថាជាព្យុះដ៏ខ្លាំងក្លានោះ កំពុងស្ថិតនៅចម្ងាយប្រហែល ៦៩០គ.ម ពីតំបន់ឆ្នេរសមុទ្រប៉ាស៊ីហ្វិករបស់ជប៉ុននៅវេលាម៉ោង ៩ព្រឹក ម៉ោងក្នុងស្រុក ដោយវាកំពុងបោកបក់ឆ្ពោះមកកាន់ទីក្រុងតូក្យូ និងតំបន់ជុំវិញ ។

ក្រុមហ៊ុនរថភ្លើងកណ្តាលជប៉ុន បាននិយាយថា ពួកគេបានលុបចោលសេវាកម្មរបស់រថយន្តល្បឿនលឿន Shinkansen ទាំងអស់ រវាងទីក្រុងតូក្យូ និងទីក្រុងឧស្សាហកម្ម Nagoya នៅថ្ងៃសុក្រ ។

ដោយឡែក ក្រុមហ៊ុនអាកាសចរណ៍ជប៉ុន និយាយថា ពួកគេគ្រោងនឹងលុបចោលជើងហោះហើរក្នុងស្រុក ១៩១វ៉ុល និងជើងហោះហើរអន្តរជាតិ ២៦វ៉ុល ដែលភាគច្រើននៃជើងហោះហើរទាំងនេះ ធ្វើដំណើរចាកចេញ ឬមកដល់អាកាសយានដ្ឋាន Haneda របស់ទីក្រុងតូក្យូ នៅថ្ងៃសុក្រនេះ ។

ដោយឡែក ក្រុមហ៊ុនអាកាសចរណ៍ ANA បានប្រកាសថា ពួកគេនឹងលុបចោល ជើងហោះហើរក្នុងស្រុក ២៨០វ៉ុល ដែលគ្រោងនឹងហោះហើរនៅថ្ងៃសុក្រ ជាហេតុធ្វើឲ្យប៉ះពាល់ដល់អ្នកដំណើរជាង ៦ម៉ឺននាក់ ៕