ប្រធានាធិបតីក្នុងតំណែងរបស់ប្រទេសស្រីលង្កា គឺលោក Ranil Wickremesinghe បានប្តេជ្ញាថា នឹងធ្វើឲ្យជីវិតរបស់ប្រជាជនមានភាពប្រសើរឡើង ខណៈដែលរូបលោកបានដាក់បេក្ខភាពរបស់លោកជាផ្លូវការ នៅឯការិយាល័យគណៈកម្មាធិការរៀបចំការបោះឆ្នោតរបស់ទីក្រុងកូឡុំបូ នាថ្ងៃព្រហស្បតិ៍ (ទី១៥ ខែសីហា) នេះ ដើម្បីចូលរួមការប្រកួតប្រជែងតំណែងប្រធានាធិបតី នៅខែកញ្ញា។

លោកប្រធានាធិបតីក្នុងតំណែងរូបនេះ បាននិយាយថា៖ «ខ្ញុំបានធ្វើឲ្យសេដ្ឋកិច្ចមានស្ថិរភាព។ ខ្ញុំបានធ្វើឲ្យផលិតកម្មកើនឡើង។ ដូច្នេះ ប្រជាជនមានអាហារបរិភោគ។ ប្រជាជនមានប្រេងឥន្ធនៈ ដើម្បីធ្វើដំណើរទៅគ្រប់ទីកន្លែង ប៉ុន្តែមិនទាន់គ្រប់គ្រាន់នៅឡើយទេ។ មនុស្សមួយចំនួន អាចមានជីវិតលំបាកនៅឡើយ។ ដូចនេះ យើងត្រូវតែធ្វើឲ្យសេដ្ឋកិច្ចមានស្ថិរភាព»។

គួរបញ្ជាក់ថា លោក Wickremesinghe ស្ថិតក្នុងចំណោមបេក្ខជនចំនួន ៣៩រូប ដែលដាក់លិខិតបេក្ខជនរបស់ខ្លួន ដើម្បីឈរឈ្មោះបោះឆ្នោត។ ដោយរួមជាមួយមេដឹកនាំគណបក្សប្រឆាំង លោក Sajith Premadasa និងសមាជិកសភាម៉ាក្សនិយម លោក Anura Kumara Dissanayake បេក្ខជនទាំង ៣រូប ត្រូវបានគេមើលឃើញថា លេចធ្លោជាងគេ។ 

លោក Wickremesinghe វ័យ ៧៥ឆ្នាំ បានកាច់ចង្កូតនាវារបស់ប្រទេសនៃមហាសមុទ្រឥណ្ឌាមួយនេះ ឆ្លងកាត់វិបត្តិហិរញ្ញវត្ថុដ៏អាក្រក់បំផុតរបស់ប្រទេស ក្នុងរយៈពេលជាច្រើនទសវត្សរ៍ ពោលគឺជាអ្វីដែលបង្កឲ្យមានការតវ៉ាពេញប្រទេស និងបានបង្ខំអ្នកកាន់តំណែងមុន គឺលោក Gotabaya Rajapaksa លាលែងពីតំណែង។

ព្រឹត្តិការណ៍បោះឆ្នោតនៅថ្ងៃទី២១ ខែកញ្ញា នឹងក្លាយជាការគូសសន្លឹកឆ្នោតដ៏សំខាន់លើកដំបូងរបស់ប្រទេសស្រីលង្កា គិតចាប់តាំងពីប្រទេសនេះលែងនៅសល់ប្រាក់បំរុងបរទេស ដោយបានធ្វើឲ្យសេដ្ឋកិច្ចធ្លាក់ទៅក្នុងភាពគាំងដំណើរការ និងបានបង្ខំឲ្យខកខានសងបំណុលបរទេស នៅឆ្នាំ២០២២៕