ក្រសួងយុត្តិធម៌បញ្ជាក់ជាថ្មីថា ផែនការអូសទាញប្រមូលប្រជាជនក្នុងស្រុក ដើម្បី​ធ្វើ​បាតុកម្មប្រឆាំង គឺជាផែនការប៉ុនប៉ងធ្វើបដិវត្តន៍ពណ៌ដើម្បីផ្តួលរំលំរាជរដ្ឋាភិបាល និង​ជា​ឧក្រិដ្ឋកម្ម​ធ្ងន់ធ្ងរបំផុត។

ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌បានបញ្ជាក់ជាថ្មីថា កន្លងទៅថ្មីៗនេះ មាន​ក្រុម​ប្រឆាំង​ជ្រុល​និយមនៅក្រៅប្រទេសមួយចំនួនបានបំភ្លៃការ​ពិតពាក់​ព័ន្ធ​នឹងគម្រោងកិច្ច​សហប្រតិបត្តិការ​អភិវឌ្ឍន៍​​តំបន់​ត្រីកោណ កម្ពុជា-ឡាវ-វៀតណាម ដោយបានចោទ​ប្រកាន់មួល​បង្កាច់​លើរា​ជ​រដ្ឋាភិបា​ល​ថា បានកាត់ដីចំនួន ៤ ខេត្តឱ្យទៅបរទេស ឬធ្វើឱ្យបាត់បង់​អធិបតេយ្យ​លើ​ខេត្ត​ឥសាន្ត​ទាំង៤ នៅក្នុងគម្រោងកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម។ ក្រុម​ប្រឆាំង​ក៏​បាន​ប្រើប្រាស់ការចោទប្រកាន់ ដោយបំភ្លៃការពិតនេះ ធ្វើសកម្មភាពអំពាវនាវ បំផុស​បំផុល​ ញុះញង់ និងអូសទាញប្រជាពលរដ្ឋស្លូតត្រង់ក្នុងស្រុក ឱ្យធ្វើបាតុកម្ម​ប្រឆាំង​នឹង​កិច្ច​សហ​ប្រតិបត្តិការ​តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម។

អ្នកនាំពាក្យក្រសួងយុត្តិធម៌បានគួរបញ្ជាក់ផងដែរថា ផែនការអូសទាញប្រមូលប្រជាជនក្នុង​ស្រុក​ដើម្បី​ធ្វើ​បាតុកម្មប្រឆាំងនឹងគម្រោងកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ពុំមែនធ្វើឡើងដើម្បីជាការសម្តែងមតិតាមច្បាប់នោះទេ ប៉ុន្តែ គឺជាផែនការប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរាជរដ្ឋាភិបាល តាមរយៈការប្រើប្រាស់នូវវិធីញុះញង់អុជអាល បំផុសបំផុល និង​ការ​ប្រើ​ឧបាយកលនយោបាយបោកបញ្ឆោតអូសទាញប្រមូលកម្លាំងប្រជាជនស្លូតត្រង់ ឱ្យធ្វើ​បាតុក​ម្ម​បះ​បោរ​ផ្តួល​​រំលំរាជរដ្ឋាភិបាលស្របច្បាប់របស់កម្ពុជា។ សកម្មភាពជុំវិញផែនការនេះ គឺជាអំពើ​វិទ្ធង្សនា​ ដែលជាឧក្រិដ្ឋកម្មធ្ងន់ធ្ងរបំផុតប៉ះពាល់ដល់សន្តិសុខនៃរដ្ឋ។

អ្នកនាំពាក្យក្រសួងយុត្តិធម៌ក៏បានបន្ថែមថា ចំពោះរាល់បុគ្គលទាំងឡាយដែលចូលរួមនៅក្នុង​គម្រោងនេះ ត្រូវជាប់ទោសពី "បទល្មើស រួមគំនិតក្បត់" ដែលជាបទឧក្រិដ្ឋមានចែង និង​ផ្តន្ទា​ទោស​តាម​បញ្ញត្តិមាត្រា ៤៥៣ នៃក្រមព្រហ្មទណ្ឌ ដោយដាក់ ពន្ធនាគារពី ៥ឆ្នាំ ទៅ ១០ឆ្នាំ ហើយ​ទោសនេះ ត្រូវបន្ថែមស្ថានទម្ងន់ទោសដាក់ពន្ធនាគារពី ១០ឆ្នាំ ទៅ ២០ឆ្នាំ ប្រសិន​បើជន​ល្មើស គឺជាអ្នករាជការសាធារណៈ។ ដោយឡែក ចំពោះបុគ្គលណាដែលបានចូលរួមក្នុងអំពើ រួម​គំនិត​ក្បត់ខាងលើ ហើយបុគ្គលនោះបានសារភាពចំពោះមុខអាជ្ញាធរមានសមត្ថកិច្ច និង​សហការ​ឈាន​ទៅបង្ក្រាបបទល្មើសនេះ នឹងត្រូវទទួលបានការលើកលែងឱ្យរួចផុតពីការទទួលទោស ដោយ​អនុលោមតាមបញ្ញត្តិ មាត្រា ៤៥៤ នៃក្រមព្រហ្មទណ្ឌ នៃព្រះរាជាណាចក្រកម្ពុជា៕ អត្ថបទ៖ ប្រាក់ វ៉ាន់ដា