ប្រធានគណបក្សខ្មែររួបរួមជាតិ ឯកឧត្តម ញឹក ប៊ុនឆៃ បានស្នើ​សុំដល់បងប្អូន​ប្រជាពលរដ្ឋ​ខ្មែរ​ទាំងអស់​ត្រូវគិត និងពិចារណាឲ្យបានច្បាស់លាស់ សូមកុំចាញ់បោកការញុះញង់ របស់ជន​ឧទ្ទាម​ក្រៅ​ច្បាប់​ទាក់​ទង​នឹងករណី CLV ដែលនាំឲ្យអន្តរាយដល់ខ្លួន និងប្រទេសជាតិ ខណៈ​កិច្ច​សហប្រតិបត្តិ​ការ​តំបន់ត្រីកោណអភិវឌ្ឍន៍​នេះ​ពុំបាន​បាត់​បង់​ខេត្ត​ទាំង​បួន​នៅ​ភូមិ​ភាគ​ឦសាន​របស់​កម្ពុជា ដូចការចោទប្រកាន់ពីសំណាក់ជនមួយក្តាប់តូចនោះទេ ផ្ទុយទៅវិញ​ខេត្ត​ទាំង​បួននេះ​មាន​តែ​រីកចម្រើនកាន់តែខ្លាំងតាមរយៈកិច្ចសហប្រតិបត្តិការនេះ។

ក្នុងកិច្ចសម្ភាសន៍ជាមួយទូរទស្សន៍BTVនាថ្ងៃទី១៦ ខែសីហា ឆ្នាំ២០២៤នេះទាក់ទងនឹងកិច្ចសហ ប្រតិបត្តិការតំបន់ត្រីកោណអភិវឌ្ឍន៍​ កម្ពុជា ឡាវ និងវៀតណាម (CLV-DTA) អ្នក​នយោបាយ​ជើង​ចាស់​មួយ​នេះ បានប្រកាសគាំទ្រ​យ៉ាង​ពេញ​ទំហឹង​នូវ​កិច្ច​សហប្រតិបត្តិការ​​តំបន់ត្រីកោណ​អភិវឌ្ឍន៍​ ដោយឯកឧត្តមចាត់ទុកថា កិច្ចសហប្រតិបត្តិការនេះវា​បាន​និង​កំពុង​ឲ្យ​ខេត្ត​ទាំង​បួន​របស់​កម្ពុជា គឺខេត្តស្ទឹងត្រែង រតនគិរី មណ្ឌលគិរិ និងខេត្តក្រចេះ​ពីតំបន់​ដាច់​ស្រយ៉ាល​មក​ជា​តំបន់​តភ្ជាប់ និងមានការអភិវឌ្ឍន៍កាន់តែច្រើនជាសេសគឺផ្នែកហេដ្ឋារចនាសម្ព័ន្ធតែម្តង។

ជាមួយគ្នានោះដែរ ឯកឧត្តមញឹក ប៊ុនឆៃ ក៏បានសម្តែងការខកចិត្តចំពោះក្រុមប្រឆាំង និង​ក្រុម​បក្ស​ពួកឧទ្ទាមក្រៅច្បាប់មួយក្តាប់តូច ដែលកំពុងរត់ចោលស្រុក បាន​ធ្វើ​ការ​ញុះញង់​ដល់​បងប្អូន​ខ្មែរ​ដែល​កំពុង រស់នៅក្នុងស្រុកយ៉ាងសុខសាន្ត ឲ្យធ្វើបាតុកម្ម ឬកុបកម្ម ដើម្បីតែបំពេញ​មហិច្ឆតា​របស់​ខ្លួន​តាម​រយៈនយោបាយលាបពណ៌​ដ៏ខ្មៅងងិតដដែលជាដដែលនោះ។ តែយ៉ាង​ណាក៏​ដោយ​ឯក​ឧត្តម ញឹក ប៊ុនឆៃ បានជឿជាក់ និងសង្ឃឹម​យ៉ាងមុតមាំថា បងប្អូនប្រជាពលរដ្ឋខ្មែរ​មិន​លង់​ទៅតាម​ការឆ្កឹះឆ្កៀលរបស់ជនអគតិទាំងនោះទៀតនោះឡើយ ហើយមួយ​វិញ​ទៀត​ប្រសិន​បើ​បង​ប្អូន​ហ៊ាន​ធ្វើតាមការអុចអាលដោ​យ​ខុសច្បាប់​របស់​ជន​អគតិ​ទាំង​នោះ​នឹង​ធ្វើ​ឲ្យ​អន្តរាយ​ដល់​ខ្លួន​តែ​ប៉ុណ្ណោះ​។

តាមរយៈកិច្ចសម្ភាសន៍ជាមួយទូរទស្សន៍BTV ឯកឧត្តម ញឹក ប៊ុនឆៃ ក៏បានអំពាវនាវដល់សមាជិក សមាជិកា និងអ្នកគាំទ្រគណបក្សខ្មែររួបរួមជាតិទាំងអស់ ត្រូវជឿជាក់​លើ​ការ​អភីវឌ្ឍន៍​តំប​ន់​ត្រីកោណ​នេះ សូមកុំស្តាប់ កុំធ្វើតាមការញុះញង់ ការអុចអាលពីក្រុមឧទ្ទាមក្រៅច្បាប់ឲ្យសោ ខណៈ​ពួកអគតិទាំងនោះធ្វើ អ្វីពុំដែលគិតដល់ផលប្រយោជន៍ជាតិ និងប្រជាជនជាធំនោះទេ ពោលគឺគិតតែផលប្រយោជន៍ផ្ទាល់ខ្លួន និងនយោបាយចងគំនុំរបស់ពួកគេតែប៉ុណ្ណោះ៕អត្ថបទ បាន ចក់