ប្រភពជាច្រើន បាននិយាយនៅថ្ងៃសុក្រនេះថា រដ្ឋាភិបាលកូរ៉េខាងត្បូង កំពុងរៀបចំផែនការកំណែទម្រង់ប្រាក់សោធននិវត្តន៍ដែលរួមបញ្ចូលអត្ថប្រយោជន៍បន្ថែមសម្រាប់ទាហាន និងម្តាយ ដើម្បីកាត់បន្ថយបន្ទុកលើក្មេងជំនាន់ក្រោយ។

លោកប្រធានាធិបតី Yoon Suk Yeol ត្រូវបានគេរំពឹងថា នឹងប្រកាសអំពីវិធានការកំណែទម្រង់សោធននិវត្តន៍ដែលផ្តោតលើការធ្វើឲ្យមានតុល្យភាពរវាងក្រុមដែលមានអាយុផ្សេងៗគ្នា និងការធានាស្ថិរភាពហិរញ្ញវត្ថុនៃប្រព័ន្ធសោធននិវត្តន៍យ៉ាងឆាប់បំផុត នៅត្រឹមចុងខែនេះ។

ការកំណែទម្រង់ប្រព័ន្ធសោធននិវត្តន៍ជាតិ គឺជារបៀបវារៈដ៏សំខាន់មួយរបស់លោក Yoon ចំពេលមានការព្រួយបារម្ភកាន់តែខ្លាំងឡើងថា មូលនិធិសោធននិវត្តន៍ អាចនឹងត្រូវបាត់បង់ឆាប់ជាងការរំពឹងទុក ដោយសារចំនួនមនុស្សចាស់កើនឡើងយ៉ាងឆាប់រហ័ស។

មន្ត្រីជាន់ខ្ពស់នៃការិយាល័យប្រធានាធិបតី បានប្រាប់ទីភ្នាក់ងារសារព័ត៌មានយ៉ុនហាប់តាមទូរស័ព្ទថា៖«ផែនការកំណែទម្រង់ប្រាក់សោធននិវត្តន៍ជាតិដែលបានស្នើឡើងរបស់រដ្ឋាភិបាល ផ្តោតលើការកាត់បន្ថយបន្ទុកលើមនុស្សជំនាន់ក្រោយ»។ «ផែនការនេះ ក៏នឹងរួមបញ្ចូលផងដែរនូវវិធានការ ដើម្បីសម្រាលបន្ទុកសោធននិវត្តន៍សម្រាប់អ្នកដែលបានបម្រើការក្នុងជួរកងទ័ព និងស្ត្រីដែលបានសម្រាលកូនរួច»។