ក្រុមគ្រួសារចំណាប់ថ្នូរ បានជួបជុំគ្នាកាលពីថ្ងៃព្រហស្បតិ៍ ដើម្បីទាមទារឲ្យដោះលែងសាច់ញាតិរបស់ពួកគេ ស្របពេលជុំថ្មីនៃកិច្ចប្រជុំបទឈប់បាញ់នៅតំបន់ហ្កាហ្សា ចាប់ផ្តើមនៅរដ្ឋធានី Doha របស់ប្រទេសកាតា ។

 នៅទីក្រុង Tel Aviv ក្រុមបាតុកររាប់ពាន់នាក់ បានដង្ហែក្បួនតាមដងផ្លូវ និងកាន់បដា ខណៈនៅទីក្រុងធំទី ៣ Haifa មនុស្សរាប់រយនាក់ បានជួបជុំគ្នា ដើម្បីអំពាវនាវឲ្យមានការដោះលែងមនុស្សជាទីស្រលាញ់របស់ពួកគេ ។

 ក្រុមមន្រ្តីនិយាយថា កិច្ចប្រជុំ បានចាប់ផ្តើមនៅទីក្រុង Doha ក្នុងនោះប្រធានចារកម្មអ៊ីស្រាអែល បានចូលរួមជាមួយសមភាគីសហរដ្ឋអាមេរិក និងអេហ្ស៊ីបរបស់លោក ហើយនិងនាយករដ្ឋមន្រ្តីកាតា នៅក្នុងជំនួបបិទទ្វារ ។

 កិច្ចចរចា ដែលជាកិច្ចខិតខំដើម្បីបញ្ចប់ការបង្ហូរឈាមគ្នានៅតំបន់ហ្កាហ្សា និងនាំយកចំណាប់ថ្នូរអ៊ីស្រាអែល និងបរទេស ១១៥នាក់ ត្រឡប់មកផ្ទះវិញនោះ ត្រូវបានរៀបចំឡើង ស្របពេលដែលអ៊ីរ៉ង់ទំនងជាងចង់សងសឹកអ៊ីស្រាអែល ក្រោយការធ្វើឃាតមេដឹកនាំក្រុមហាម៉ាស់លោក Ismail Haniyeh នៅទីក្រុងតេអេរ៉ង់ កាលពីថ្ងៃទី ៣១ ខែកក្កដា ។

 ខណៈពេលនោះដែរ ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស់ បាននិយាយថា ជនប៉ាឡេស្ទីនជាង ៤ម៉ឺននាក់ ត្រូវបានសម្លាប់ដោយសារសកម្មភាពយោធារបស់អ៊ីស្រាអែលនៅក្នុងតំបន់ហ្កាហ្សាចាប់តាំងពីការវាយប្រហារថ្ងៃទី ៧ ខែតុលាឆ្នាំមុន ។ 

ពួកគេអះអាងថា ចំនួនអ្នកស្លាប់សរុបឡើងដល់ ៤០.០០៥នាក់ គិតត្រឹមថ្ងៃព្រហស្បតិ៍សប្ដាហ៍ម្សិលមិញ ពោលគឺស្មើនឹងប្រហែល ១,៧% នៃចំនួនប្រជាជន ២,៣លាននាក់របស់ដែនដីបិទច្រកមួយនេះ ៕