នៅក្នុងរូបភាពវីដេអូឃ្លីបដែលបានបញ្ចេញនៅថ្ងៃសុក្រនេះ ឃើញផ្សែងខ្មៅហុយឡើងលើមេឃ នៅតំបន់ខ្ពង់រាប Golan Heights កាន់កាប់ដោយអ៊ីស្រាអែល ស្របពេលដែលកងកម្លាំងអ៊ីស្រាអែល និងក្រុមហេសប៊ូឡា បានផ្ទុះអាវុធដាក់គ្នា ។

យោធាអ៊ីស្រាអែល និយាយថា ការវាយប្រហារតាមច្រកអាកាសសង្ស័យចេញពីលីបង់ ត្រូវបានបាញ់ស្កាត់ ហើយកាំជ្រួចផ្លោងប្រហែល ២៥គ្រាប់ ត្រូវបានបាញ់ឆ្លងកាត់ព្រំដែន ចេញពីប្រទេសលីបង់ ចូលទៅក្នុងទឹកដីអ៊ីស្រាអែល ។

ពួកគេនិយាយថា គ្មានសេចក្តីរាយការណ៍ពីអ្នករងរបួស ឬគ្រោះថ្នាក់ដល់អាយុជីវិតនោះទេ ។

គួរឲ្យដឹងថា អ៊ីស្រាអែល និងក្រុមហេសប៊ូឡា បានផ្ទះអាវុធដាក់គ្នាអស់រយៈពេលជាច្រើនខែមកហើយ ។

ដោយឡែក កាលពីថ្ងៃពុធកន្លងទៅ ប្រេសិតពិសេសសហរដ្ឋអាមេរិកលោក Amos Hochstein បាននិយាយថា លោកមានជំនឿថា ការផ្ទុះសង្រ្គាមពេញលេញ រវាងអ៊ីស្រាអែល និងក្រុមជីវពលដ៏មានអំណាចហេសប៊ូឡារបស់លីបង់ អាចនឹងចៀសផុត ប៉ុន្តែអ៊ីស្រាអែល និងក្រុមហាម៉ាស់ ត្រូវការបោះជំហានឆ្ពោះទៅរកកិច្ចព្រមព្រៀងសន្តិភាពនៅតំបន់ហ្កាហ្សាដោយមិនត្រូវពន្យាពេលបន្ថែមទៀតនោះទេ ។

ក្រុមហេសប៊ូឡាគាំទ្រដោយអ៊ីរ៉ង់ បានចាប់ផ្តើមវាយប្រហារឆ្លងព្រំដែនលើអ៊ីស្រាអែល ភ្លាមៗក្រោយកងកម្លាំងអ៊ីស្រាអែល ចាប់ផ្តើមប្រតិបត្តិការសឹករបស់ពួកគេនៅតំបន់ហ្កាហ្សា ជាការឆ្លើយតបនឹងការវាយប្រហារសម្លាប់មនុស្សរបស់ក្រុមហាម៉ាស់លើអ៊ីស្រាអែលកាលពីថ្ងៃទី ៧ ខែតុលា ៕