ប្រធានាធិបតីសហរដ្ឋអាមេរិក Joe Biden និងអនុប្រធានាធិបតី Kamala Harris បានបង្ហាញពីការរួបរួមគ្នាមួយ កាលពីថ្ងៃព្រហស្បតិ៍ (ទី១៥ ខែសីហា) នេះ ខណៈដែលពួកគេបានប្រារព្ធព្រឹត្តិការណ៍សាធារណៈរួមគ្នាលើកដំបូង គិតចាប់តាំងពីលោកស្រី Harris បានជំនួសតំណែងលោក Biden ក្នុងនាមជាបេក្ខជនរបស់គណបក្សប្រជាធិបតេយ្យ ដើម្បីចូលរួមការបោះឆ្នោតខែវិច្ឆិកា។

អំឡុងព្រឹត្តិការណ៍នោះ ការស្រែកពាក្យ «អរគុណ លោក Joe!» បានបន្លឺចេញមកពីក្នុងចំណោមទស្សនិកជន នៅមហាវិទ្យាល័យសហគមន៍ នាជាយក្រុងរបស់រដ្ឋ Maryland ខាងក្រៅទីក្រុងវ៉ាស៊ីនតោន។ នៅទីនោះ លោក Biden បានប្រកាសពីកិច្ចព្រមព្រៀងដ៏ធំមួយ ដើម្បីកាត់បន្ថយតម្លៃថ្នាំ សម្រាប់អ្នកចូលនិវត្តន៍ ជុំវិញកម្មវិធីសុខុមាលភាពសង្គម។

ប៉ុន្តែបុគ្គលដ៏លេចធ្លោបំផុត គឺលោកស្រី Harris ដែលបានធ្វើឲ្យមនុស្សជាច្រើនភ្ញាក់ផ្អើល ដោយការបង្រួបបង្រួមគណបក្សប្រជាធិបតេយ្យ និងបានឡើងប្រជាប្រិយភាពយ៉ាងខ្លាំងក្លា នៅក្នុងការស្ទង់មតិទល់នឹងលោក Donald Trump មកពីគណបក្សសាធារណរដ្ឋ ចាប់តាំងពីលោកស្រីចូលប្រកួតប្រជែងភ្លាមៗ ដណ្ដើមកៅអីសេតវិមាន។ លោក Biden បានពោលសរសើរលោកស្រី Harris ថា៖ «ស្ត្រីម្នាក់នេះអាចក្លាយជាប្រធានាធិបតីដ៏ឆ្នើមម្នាក់»។

មិនយូរប៉ុន្មានបន្ទាប់ពីការបង្ហាញខ្លួនរួមគ្នារបស់ប្រធានាធិបតីអាមេរិក និងអនុប្រធានាធិបតីនោះ លោក Trump បានបញ្ចេញនូវការអត្ថាធិប្បាយដ៏ច្របូកច្របល់ និងជាញឹកញាប់ពេញទៅដោយកំហឹង ពីក្លិបវាយកូនហ្គោល New Jersey របស់លោក មុនពេលឆ្លើយសំណួរទៅអ្នកសារព័ត៌មានមួយចំនួនតូច។ អតីតប្រធានាធិបតីរូបនេះ បាននិយាយក្នុងន័យវាយប្រហារ ដោយលើកឡើងថា លោកស្រី Harris មាន «ទំនោរទៅរកកុម្មុយនីស្តខ្លាំង» ហើយនឹងមានន័យស្មើនឹង «ការបំផ្លាញខ្ទេចខ្ទីនូវក្តីសុបិន្តរបស់អាមេរិក»។

គួរបញ្ជាក់ថា មហាសេដ្ឋីអចលនទ្រព្យ ដែលរួបរឹតទៅដោយរឿងអាស្រូវ បានជួបការលំបាកក្នុងការជំរុញយុទ្ធនាការរបស់លោក គិតចាប់តាំងពីលោក Biden បានប្រកាសដកខ្លួនពីការប្រកួតប្រជែង កាលពីថ្ងៃទី២១ ខែកក្កដា ដោយសារមានការព្រួយបារម្ភ ក្នុងរង្វង់គណបក្សលទ្ធិប្រជាធិបតេយ្យពីភាពរឹងមាំរបស់លោក ក្នុងការបំពេញតួនាទីនេះ ខណៈដែលលោកមានវ័យ ៨១ឆ្នាំហើយនោះ៕