មេដឹកនាំនៃប្រទេសអូស្ត្រាលី និងនូវ៉ែលហ្សេឡង់ នៅថ្ងៃសុក្រនេះ (ទី១៦ ខែសីហា) បាននិយាយថា កតិកាសញ្ញាការពារត្រីភាគី AUKUS នឹងជំរុញសន្តិសុខ និងស្ថិរភាព ក្នុងតំបន់ ខណៈដែលប្រទេសទាំង២ បានព្រមានថា ពួកគេកំពុងប្រឈមនឹងបរិយាកាសយុទ្ធសាស្ត្រដ៏លំបាកបំផុត គិតចាប់តាំងពីសង្គ្រាមលោកលើកទី២ មក។

ប្រទេសនូវ៉ែលហ្សេឡង់ មិនមែនជាភាគីនៃកតិកាសញ្ញាការពារជាតិ រវាងសហរដ្ឋអាមេរិក អូស្ត្រាលី និងអង់គ្លេសនោះទេ ប៉ុន្តែបាន និងកំពុងសម្លឹងរកមើលកិច្ចសហប្រតិបត្តិការមួយ នាពេលខាងមុខ ស្ដីអំពី «សសរស្តម្ភទី២» នៃកិច្ចព្រមព្រៀងដែលផ្តោតលើបច្ចេកវិទ្យាយោធារួមគ្នា។

«សសរស្តម្ភទី២» នៃកតិកាសញ្ញា AUKUS គឺដាច់ដោយឡែកពីសសរស្តម្ភទី១ ដែលត្រូវបានបង្កើតឡើងដើម្បីបញ្ជូននាវាមុជទឹកដើរដោយថាមពលនុយក្លេអ៊ែរទៅកាន់ប្រទេសអូស្ត្រាលី។ សហរដ្ឋអាមេរិកបាននិយាយថា ទ្វារបានបើកចំហជានិច្ច សម្រាប់ការចូលរួមរបស់នូវ៉ែលហ្សេឡង់ជាមួយ AUKUS។

នាយករដ្ឋមន្ត្រីនូវ៉ែលហ្សេឡង់ លោក Christopher Luxon បាននិយាយថា ទំនាក់ទំនងសន្តិសុខជាមួយអូស្ត្រាលី ដែលជាសម្ព័ន្ធមិត្តការពារផ្លូវការតែមួយគត់របស់នូវ៉េលហ្សេឡង់ នឹងនៅតែមានភាពជិតស្និទ្ធដដែល។

ជាមួយគ្នានេះ មេដឹកនាំទាំង២ បានគូសបញ្ជាក់ពីការគំរាមកំហែងពីការលុកចូលប្រព័ន្ធអ៊ីនធឺណិត ហើយបាននិយាយថា ពួកគេនឹងចាត់ទុកការលួចចូលនេះជាការវាយប្រហារប្រដាប់អាវុធ ប្រសិនបើវាគំរាមកំហែងដល់បូរណភាពទឹកដី ឯករាជ្យភាពនយោបាយ ឬសន្តិសុខរបស់ប្រទេសណាមួយនោះ៕