ទីភ្នាក់ងារសារព័ត៌មានរដ្ឋ Belta បានរាយការណ៍ថា រដ្ឋមន្ត្រីការពារជាតិបេឡារុស លោក Viktor Khrenin នៅថ្ងៃសុក្រ (ទី១៦ ខែសីហា) បាននិយាយថា លទ្ធភាព គឺមានខ្ពស់ ដែលប្រទេសជិតខាងអ៊ុយក្រែនបង្កហេតុដោយប្រដាប់អាវុធ ហើយថា ស្ថានភាពនៅតាមព្រំដែនរួមគ្នារបស់ប្រទេសទាំង២ «នៅតែមានភាពតានតឹង» ដដែល។

ការលើកឡើងបែបនេះរបស់លោក Khrenin បានកើតមានឡើង ក្នុងរយៈពេលជាង ១សប្តាហ៍ បន្ទាប់ពីអ៊ុយក្រែនបានបញ្ជូនទាហានរាប់ពាន់នាក់ឆ្លងកាត់ព្រំដែនភាគខាងលិចរបស់រុស្ស៊ី ដែលជាការលុកលុយដ៏គួរឲ្យភ្ញាក់ផ្អើលមួយ។

បើយោងតាមសារព័ត៌មាន Belta បានឲ្យដឹងថា លោក Khrenin បាននិយាយថា «ដោយមានវត្តមានរបស់កងកម្លាំងប្រដាប់អាវុធអ៊ុយក្រែន នៅតំបន់ព្រំដែន លទ្ធភាពគឺមានខ្ពស់ ក្នុងការរៀបចំ និងអនុវត្តការបង្កហេតុដោយប្រដាប់អាវុធ នៅលើដែនដីរបស់យើង ក៏ដូចជាសកម្មភាពធំៗផ្សេងទៀត ក្នុងនោះរួមទាំងការចូលរួមក្នុងទម្រង់ជាតិនិយមបេឡារុស» ផងដែរ។

យោធាអ៊ុយក្រែន មិនបានឆ្លើយតបភ្លាមៗអ្វីឡើយ ចំពោះសំណើជាលាយលក្ខណ៍អក្សរ ដើម្បីសុំការធ្វើអត្ថាធិប្បាយ។ កាលពីថ្ងៃសៅរ៍សប្ដាហ៍កន្លងទៅ បេឡារុសបានប្រាប់ថា ខ្លួនកំពុងបញ្ជូនកងទ័ពទៅពង្រឹងព្រំដែនភាគខាងត្បូងរបស់ខ្លួនជាមួយអ៊ុយក្រែន បន្ទាប់ពីបានចោទប្រកាន់ទីក្រុងគីវថា បានរំលោភលើដែនអាកាសរបស់ខ្លួន ដោយយានដ្រូន។ តែទីក្រុងគីវ បាននិយាយថា ខ្លួនមិនបានឃើញសញ្ញាបង្កើនទាហានរបស់បេឡារុស្សនោះទេ ហើយក៏មិនបានធ្វើអត្ថាធិប្បាយជាផ្លូវការលើការចោទប្រកាន់ពីការរំលោភដែនអាកាសនោះដែរ៕