រដ្ឋមន្ត្រីការបរទេសហ្វីលីពីន លោក Enrique Manalo នៅថ្ងៃសុក្រ (ទី១៦ ខែសីហា) នេះ បាននិយាយថា ការបង្កើនសន្តិសុខ និងការចូលរួមផ្នែកសេដ្ឋកិច្ចអន្តរជាតិរបស់ហ្វីលីពីន គឺដើម្បីផលប្រយោជន៍ផ្ទាល់របស់ប្រទេស ហើយមិនបានសំដៅទៅលើប្រទេសណាមួយនោះឡើយ។

នៅឯវេទិកាជាមួយអ្នកឆ្លើយឆ្លងព័ត៌មានបរទេស លោក Manalo បាននិយាយថា៖ «តាមរយៈការរៀបចំផ្សេងៗទាំងនេះ អ្វីដែលយើងមានបំណង គឺមិនត្រឹមតែលើកកម្ពស់សន្តិសុខ ជាពិសេសផ្នែកការពារជាតិប៉ុណ្ណោះទេ ប៉ុន្តែថែមទាំងសន្តិសុខសេដ្ឋកិច្ចផងដែរ»។

កតិកាសញ្ញាសន្តិសុខ និងសេដ្ឋកិច្ច រវាងហ្វីលីពីន និងសម្ព័ន្ធមិត្ត ក្នុងនោះរួមទាំងសហរដ្ឋអាមេរិក និងជប៉ុនផងដែរ បាន និងកំពុងបង្កើនឡើង ចំពេលមានការកើនឡើងនូវសកម្មភាពអះអាងរបស់ចិន នៅសមុទ្រចិនខាងត្បូង។

ប្រទេសហ្វីលីពីន និងចិន នាពេលថ្មីៗនេះ បានព្រមព្រៀងគ្នា ស្ដីអំពីការរៀបចំបណ្តោះអាសន្ន ជុំវិញបេសកកម្មផ្ដល់សម្ភារផ្គត់ផ្គង់ឡើងវិញរបស់ទីក្រុងម៉ានីលដល់នាវាដែលបោះយុថ្កាចតចោល នៅឯតំបន់មានជម្លោះ គឺតំបន់ថ្មប៉ប្រះទឹក Second Thomas Shoal ដើម្បីបន្ធូរបន្ថយភាពតានតឹង និងដោះស្រាយការយល់ឃើញខុសគ្នា។

នៅពេលដែលត្រូវបានសួរថា តើការរៀបចំនោះ អាចចម្លងយកទៅធ្វើនៅតំបន់ផ្សេងទៀតនៃសមុទ្រចិនខាងត្បូងដែរ ឬទេ លោក Manalo បានឆ្លើយថា វាអាស្រ័យលើស្ថានភាពជាក់ស្ដែង៕