ប្រទេសជប៉ុនបានចេញបញ្ជាមនុស្សរាប់ពាន់នាក់ជម្លៀសខ្លួន និងលុបចោលជើងហោះហើររាប់សិបវ៉ុល ខណៈដែលព្យុះទីហ្វុង «ដ៏ខ្លាំង» បានបោកបក់ជាមួយនឹងកម្លាំងខ្យល់ដ៏គ្រោះថ្នាក់ សំដៅទៅកាន់តែជិតនឹងភាគខាងកើតប្រទេស។

ទូរទស្សន៍សាធារណៈ NHK បានរាយការណ៍ថា ទីភ្នាក់ងារឧតុនិយមជប៉ុន (JMA) នៅថ្ងៃសុក្រ (ទី១៦ ខែសីហា) នេះ បានព្យាករថា ព្យុះទីហ្វុង Ampil ស្ថិតនៅចម្ងាយ ១៧០គីឡូម៉ែត្រនៃភាគខាងត្បូងទីក្រុង Choshi ក្នុងខេត្ត Chiba នៅវេលាម៉ោង ៤រសៀល (ត្រូវនឹងម៉ោង ៧ ម៉ោងសកល) ដែលមានទីតាំងជិតទីក្រុងតូក្យូ នៅភាគខាងកើតតំបន់ Kanto។

JMA បានឲ្យដឹងថា ពេលនេះ ដោយកំពុងបើកបក់លើមហាសមុទ្រប៉ាស៊ីហ្វិក ក្នុងល្បឿនដ៏លឿន ព្យុះទីហ្វុង Ampil ត្រូវបានគេរំពឹងថា នឹងចូលទៅកៀកតំបន់ទីក្រុងតូក្យូ នៅល្ងាចថ្ងៃសុក្រនេះ ជាមួយនឹង «កម្លាំងខ្យល់បក់បោកខ្លាំង» ដែលទំនងជា «បណ្តាលឲ្យអ្នកស្រុកមានរបួស ដោយសារកម្ទេចកម្ទីហោះហើររប៉ាត់រប៉ាយ ឬសូម្បីតែធ្វើឲ្យរថយន្តដឹកទំនិញកំពុងបើកបរក្រឡាប់។

គួរបញ្ជាក់ថា ព្យុះទីហ្វុងនេះ មានល្បឿនខ្យល់បក់ ៤៥ម៉ែត្រ ក្នុង ១វិនាទី ដោយល្បឿនខ្យល់អតិបរមា ៦០ម៉ែត្រ ក្នុង ១វិនាទី (២១៦គីឡូម៉ែត្រ ក្នុង ១ម៉ោង)។ ដោយការបក់បោកកាន់តែជិតទៅដល់របស់ព្យុះនេះ ទីក្រុងមួយចំនួន នៅតំបន់ Kanto និងកន្លែងផ្សេងទៀត ជំរុញឲ្យអ្នកស្រុកជម្លៀសចេញទៅរកទីកន្លែងសុវត្ថិភាព៕