មជ្ឈមណ្ឌលអឺរ៉ុប សម្រាប់ការបង្ការ និងគ្រប់គ្រងជំងឺ (CDC) បានបង្កើនកម្រិតហានិភ័យរបស់ខ្លួនសម្រាប់ជំងឺអុតស្វា នៅថ្ងៃសុក្រ (ទី១៦ ខែសីហា) នេះ ហើយបានស្នើឲ្យប្រទេសនានាបន្តផ្ដល់ការយល់ដឹងកម្រិតខ្ពស់ ក្នុងចំណោមអ្នកដំណើរដែលមកពីតំបន់រងផលប៉ះពាល់។

ទីភ្នាក់ងារនេះ បានលើកឡោះងថា ឥឡូវនេះ ខ្លួនមើលឃើញហានិភ័យ «កម្រិតមធ្យម» នៃជំងឺអុតស្វា បើប្រៀបធៀបទៅនឹង «កម្រិតទាប» នៅមុននេះ សម្រាប់ប្រជាជន និងអ្នកធ្វើដំណើរគ្រប់ទីកន្លែង។ មជ្ឈមណ្ឌលនេះបានបន្ថែមថា លទ្ធភាពនៃការបន្តឆ្លង ក្នុងទ្វីបអឺរ៉ុប នៅតែមានកម្រិតទាបនៅឡើយ ប្រសិនបើករណីឆ្លងជំងឺពីខាងក្រៅមក ត្រូវបានធ្វើរោគវិនិច្ឆ័យ ហើយវិធានការត្រួតពិនិត្យ ត្រូវបានអនុវត្តយ៉ាងឆាប់រហ័ស។

គួរបញ្ជាក់ថា ការផ្ទុះឡើងនាពេលនេះ នៅក្នុងសាធារណរដ្ឋប្រជាធិបតេយ្យកុងហ្គោ បានចាប់ផ្តើមជាមួយនឹងការរីករាលដាលនៃមេរោគឆ្លងដែលត្រូវបានគេស្គាល់ថា វីរុស I។ ប៉ុន្តែវីរុសប្រភេទថ្មី គឺ Ib ហាក់ដូចជារីករាលដាលកាន់តែងាយស្រួលជាង តាមរយៈការទាក់ទងជិតស្និទ្ធជាប្រចាំ ក្នុងនោះរួមទាំងទំនាក់ទំនងផ្លូវភេទផងដែរ។

កាលពីដើមសប្តាហ៍នេះ អង្គការសុខភាពពិភពលោក (WHO) បានប្រកាសការផ្ទុះឡើងនៃជំងឺនេះ នៅក្នុងទ្វីបអាហ្រ្វិកថា ជាគ្រាអាសន្នផ្នែកសុខភាពសាធារណៈ បន្ទាប់ពីករណីវីរុស Ib បានចាប់ផ្តើមរីករាលដាលដល់ប្រទេសជិតខាងនៃប្រទេសកុងហ្គោ។

ហើយកាលពីថ្ងៃព្រហស្បតិ៍ (ទី១៥ ខែសីហា) ករណីនៃការផ្ទុះថ្មីត្រូវបានបញ្ជាក់នៅក្នុងប្រទេសស៊ុយអែត ដែលជាសញ្ញាដំបូងនៃការរីករាលដាលរបស់ជំងឺនេះ នៅខាងក្រៅទ្វីបអាហ្វ្រិក។ CDC អឺរ៉ុបបានផ្តល់អនុសាសន៍ថា អាជ្ញាធរសុខភាពសាធារណៈ ត្រូវមានផែនការ និងរៀបចំ ដើម្បីឲ្យមានការរកឃើញយ៉ាងឆាប់រហ័សនៃករណីវីរុស I ដែលអាចទៅដល់អឺរ៉ុប។ ស្ថាប័ននេះព្យាករថា ផលប៉ះពាល់ពីវីរុសប្រភេទនេះ នឹងមានកម្រិតទាប នៅអឺរ៉ុប ប្រសិនបើការតាមដានឃ្លាំមើល និងវិធានការត្រួតពិនិត្យត្រូវបានអនុវត្តយ៉ាងត្រឹមត្រូវ៕