ការិយាល័យរបស់ប្រធានាធិបតី នៅថ្ងៃសុក្រ (ទី១៦ ខែសីហា) នេះ បានប្រាប់ឲ្យដឹងថា លោក Emmanuel Macron បានអញ្ជើញមេដឹកនាំគណបក្សមកពីសភាទាំង២ របស់ប្រទេសបារាំង ដើម្បីបើកកិច្ចពិភាក្សា នៅថ្ងៃទី២៣ ខែសីហា ក្នុងគោលបំណងជ្រើសរើសនាយករដ្ឋមន្ត្រីថ្មី។

បន្ទាប់ពីមាននូវការបោះឆ្នោតដ៏គួរឲ្យភ្ញាក់ផ្អើល កាលពីថ្ងៃទី៧ ខែកក្កដា ដែលបញ្ចប់ទៅដោយមានសភាជាប់គាំង និងផ្ដល់នូវលទ្ធផលបរាជ័យយ៉ាងធ្ងន់ធ្ងរការដល់ក្រុមចម្រុះនិយមកណ្តាលរបស់លោក Macron រដ្ឋាភិបាលរបស់នាយករដ្ឋមន្រ្តីជិតផុតអាណត្តិ លោក Gabriel Attal បានដឹកនាំប្រទេសបារាំង ឆ្លងកាត់ព្រឹត្តិការណ៍កីឡាអូឡាំពិកទីក្រុងប៉ារីស ក្នុងនាមជារដ្ឋាភិបាលចាំផ្ទះ។

ដោយមានសន្តិភាពផ្នែកនយោបាយ អំឡុងការប្រកួតកីឡាអូឡាំពិកនេះ លោក Macron មានគោលបំណងជ្រើសរើសនាយករដ្ឋមន្ត្រី នៅពាក់កណ្តាលខែសីហា។ តែរហូតមកដល់ពេលនេះ លោកបានព្រងើយកន្តើយ ចំពោះបេក្ខជន ដែលទទួលបានការយល់ព្រមពីសម្ព័ន្ធភាពឆ្វេងនិយម គឺគណបក្ស New Popular Front (NPF) ដែលបានឈរនៅលំដាប់ទី១ ក្នុងការបោះឆ្នោត។

ការិយាល័យរបស់លោក Macron បានឲ្យដឹងនៅក្នុងសេចក្តីថ្លែងការណ៍ថា គោលបំណងនៃកិច្ចប្រជុំនាថ្ងៃទី២៣ ខែសីហា ជាមួយប្រធាននៃក្រុមគណបក្សនៅក្នុងរដ្ឋសភា និងព្រឹទ្ធសភា គឺដើម្បី «បង្កើតបានសំឡេងភាគច្រើនដ៏ទូលំទូលាយបំផុត និងស្ថិរភាពបំផុត ដែលអាចកើតមាន ដើម្បីបម្រើប្រទេស»៕