ក្រសួងការបរទេសសហរដ្ឋអាមេរិក បាននិយាយកាលពីថ្ងៃសុក្រ ទី១៦ សីហា ថា រដ្ឋមន្ត្រីការបរទេសអាមេរិក លោក Antony Blinken នឹងធ្វើដំណើរទៅកាន់ប្រទេសអ៊ីស្រាអែល នៅចុងសប្តាហ៍នេះ ដើម្បីជំរុញកិច្ចព្រមព្រៀងបទឈប់បាញ់នៅតំបន់ហ្កាហ្សា ខណៈសហរដ្ឋអាមេរិក ព្យាយាមផ្សារភ្ជាប់ភាពចន្លោះប្រហោង ក្នុងកិច្ចចរចានៅក្នុងតំបន់។

សេចក្តីថ្លែងការណ៍របស់ក្រសួងការបរទេសបាននិយាយថា លោក Blinken នឹងចាកចេញទៅអ៊ីស្រាអែល នៅថ្ងៃសៅរ៍នេះ ហើយស្វែងរក ការបញ្ចប់កិច្ចព្រមព្រៀងសម្រាប់បទឈប់បាញ់ និងការដោះលែងចំណាប់ខ្មាំង និងអ្នកជាប់ឃុំឃាំង តាមរយៈការផ្សារភ្ជាប់សំណើ ដែលបានបង្ហាញដោយសហរដ្ឋអាមេរិក កាលពីថ្ងៃសុក្រ ក្នុងអំឡុងពេលកិច្ចពិភាក្សានៅទីក្រុង Doha ។

លោកប្រធានាធិបតី Joe Biden កាលពីថ្ងៃសុក្រ បាននិយាយថា «យើងកាន់តែខិតជិតជាងអ្វីដែលយើងធ្លាប់ទទួលបាន» ចំពោះបទឈប់បាញ់នៅក្នុងសង្រ្គាមតំបន់ហ្កាហ្សា រយៈពេល១០ខែ បន្ទាប់ពីកិច្ចពិភាក្សារយៈពេលពីរថ្ងៃ នៅក្នុងរដ្ឋធានី Doha ប្រទេសកាតា។

លោក Sean Savett អ្នកនាំពាក្យក្រុមប្រឹក្សាសន្តិសុខជាតិបាននិយាយថា លោក Biden បានសន្ទនាតាមទូរស័ព្ទជាមួយប្រធានាធិបតីប្រទេសអេហ្ស៊ីប Abdel Fattah al-Sisi និងមេដឹកនាំកាតា លោក Sheikh Tamim bin Hamad Al-Thani ដើម្បីពិភាក្សាអំពី វឌ្ឍនភាពដ៏សំខាន់នៅក្នុងកិច្ចពិភាក្សា។ លោក Biden និងមេដឹកនាំអារ៉ាប់សំខាន់ទាំងពីរ បានជំរុញជាសាធារណៈដល់ក្រុមហាម៉ាស និងអ៊ីស្រាអែល ឱ្យចូលរួមកិច្ចចរចានេះ។

កាលពីពេលមុន សេតវិមានបាននិយាយថា អ្នកការទូតនឹងបន្តធ្វើការលើព័ត៌មានលម្អិត ដោយសង្ឃឹមថា នឹងបញ្ចប់កិច្ចព្រមព្រៀងនៅសប្តាហ៍ក្រោយ នៅក្នុងទីក្រុងគែរ។ 

សេចក្តីថ្លែងការណ៍របស់ក្រសួងការបរទេស បាននិយាយថា «សំណើនេះ នឹងទទួលបានបានបទឈប់បាញ់នៅតំបន់ហ្កាហ្សា ធានាបានការដោះលែងចំណាប់ខ្មាំងទាំងអស់ ធានាបានថាជំនួយមនុស្សធម៌ត្រូវបានចែកចាយនៅទូទាំងតំបន់ហ្កាហ្សា និងបង្កើតលក្ខខណ្ឌសម្រាប់ស្ថិរភាពក្នុងតំបន់ដ៏ទូលំទូលាយ។