ផ្សែងហុយ និងធូលី នៅក្នុងជំរំជនភៀសខ្លួន al-Nuseirat តំបន់ហ្កាហ្សា គឺជាសញ្ញាច្បាស់លាស់នៃការវាយប្រហារតាមអាកាសរបស់អ៊ីស្រាអែល។ ខណៈជនស៊ីវិលប្រញាប់ប្រញាល់ ទៅកាន់កន្លែងកើតហេតុ ដើម្បីស្វែងរកអ្នករបួស ឬស្លាប់ នៅកន្លែងកើតហេតុបានបញ្ជាក់ការពិតថា ការចរចាបទឈប់បាញ់ មិនទាន់ធានាបានដល់ការផ្អាកប្រយុទ្ធនៅឡើយទេ។ អ្នកសម្របសម្រួល បាននិយាយថាការចរចានៅក្នុងរដ្ឋធានី Doha របស់ប្រទេសកាតា ត្រូវបានផ្អាកកាលពីថ្ងៃសុក្រ ដោយអ្នកចរចា គ្រោងនឹងជួបគ្នាម្តងទៀត នៅសប្តាហ៍ក្រោយ។

នៅក្នុងសេចក្តីថ្លែងការណ៍រួម សហរដ្ឋអាមេរិក ប្រទេសកាតា និងអេហ្ស៊ីប បាននិយាយថា ទីក្រុងវ៉ាស៊ីនតោន បានបង្ហាញសំណើថ្មី ដោយបិទគម្លាតរវាងភាគីទាំងអស់នៅក្នុងវិធីមួយដែលអាចអនុញ្ញាតឱ្យមានការអនុវត្តយ៉ាងឆាប់រហ័សនៃកិច្ចព្រមព្រៀងមួយ។ ពួកគេបាននិយាយនៅក្នុងសេចក្តីថ្លែងការណ៍ថា បច្ចុប្បន្ននេះ ផ្លូវត្រូវបានកំណត់សម្រាប់លទ្ធផលនៃ ការសង្គ្រោះជីវិត ការនាំយកជំនួយទៅដល់ប្រជាជននៅតំបន់ហ្កាហ្សា និងការបន្ថយភាពតានតឹងក្នុងតំបន់។ ខណៈនៅក្នុងប្រទេសលីបង់ រដ្ឋមន្ត្រីការបរទេសអេហ្ស៊ីប បាននិយាយថា កិច្ចព្រមព្រៀងឈប់បាញ់ អាចជាមធ្យោបាយតែមួយគត់ ដើម្បីទប់ស្កាត់ការរីកធំជម្លោះបន្ថែមទៀត។

ការឈានទៅដល់កិច្ចព្រមព្រៀងយ៉ាងឆាប់រហ័ស នាំទៅរកបទឈប់បាញ់បន្ទាន់ ការបញ្ចប់ការសម្លាប់ជនស៊ីវិល និងការដោះដូរអ្នកទោស និងចំណាប់ខ្មាំង គឺជាគន្លឹះនៃការចាប់ផ្តើមនៃដំណោះស្រាយនៅក្នុងតំបន់នេះ ជាការចាប់ផ្តើមកាត់បន្ថយការរីកធំនៃជម្លោះ និងការចាប់ផ្តើមរពារតំបន់នេះ មិនឱ្យធ្លាក់ចូលទៅក្នុងភ្លើងនៃសង្គ្រាមរាលដាល។

យោងតាមចំនួនសរុបរបស់អ៊ីស្រាអែល បានឲ្យដឹងថា ជម្លោះ បានចាប់ផ្តើមកាលពីថ្ងៃទី៧ ខែតុលា នៅពេលដែលក្រុមអ្នកប្រយុទ្ធហាម៉ាស បានវាយលុកចូលអ៊ីស្រាអែល ដោយបានសម្លាប់មនុស្សប្រហែល១.២០០០នាក់ និងចាប់ចំណាប់ខ្មាំងប្រហែល ២៥០ នាក់។ យុទ្ធនាការយោធាជាបន្តបន្ទាប់របស់អ៊ីស្រាអែល បានពង្រាបតំបន់ហ្កាហ្សាភាគច្រើនទៅជាកម្ទេចថ្ម និងបានសម្លាប់ពលរដ្ឋប៉ាឡេស្ទីនជាង ៤០.០០០នាក់ ដែលភាគច្រើនជាជនស៊ីវិល នេះបើយោងតាមអាជ្ញាធរសុខាភិបាលប៉ាឡេស្ទីន។ អ៊ីស្រាអែល និយាយថា ខ្លួនបានសម្លាប់អ្នកប្រយុទ្ធក្រុមហាម៉ាស១៧.០០០នាក់។ 

មន្ត្រីអ៊ីស្រាអែល បាននិយាយថា នាយករដ្ឋមន្ត្រី លោក Benjamin Netanyahu ត្រូវបានគេរំពឹងថានឹងជួបជាមួយរដ្ឋមន្ត្រីការបរទេសអាមេរិក លោក Antony Blinken នៅថ្ងៃចន្ទ។